Magnús Þór Jónsson @maggimark

Textalýsing Skýrslan Viðtöl

Hvað réði úrslitum? Tvö mörk Breiðabliks í framlengingu töldu að lokum, Höskuldur Gunnlaugsson með tvær magnaðar afgreiðslur sem kláruðu þennan leik. Það er það sem gæðaleikmenn gera, nýta sér þau tækifæri sem gefast, hver sem aðdragandinn er. Bestu leikmenn 1. Höskuldur Gunnlaugsson Afskaplega líflegur allan þennan leik, fékk fyrsta vítið fyrir Blika og svo voru tvær afgreiðslur í hæsta gæðaflokki í framlengingunni. Frábær frammistaða. 2. Valdimar Þór Ingimundarson Frábær afgreiðsla í fyrsta marki Fylkis og síndi svo markanefið þegar hann "stal" markinu hans Castillion á fullkomlega eðlilegan hátt. Aggressívur allan leikinn. Atvikið Þriðja markið í þessum leik verður að fá athygli. Löng sending kom frá vallarhelmingi Breiðabliks inn í teig Fylkis. Ansi margir Blikar eru innan við vörn Fylkis, þ.á.m. Höskuldur sem hleypur að Ara og utan í hann. Snertingin ekki mikil en virkaði þó leikbrot úr blaðamannastúkunni. Ari skallar boltann hátt upp í loftið og þaðan fer boltinn á Höskuld sem klínir hann í markið. Mark sem átti ekki að standa út frá mínu sjónarhorni.

Hvað þýða úrslitin? Blikar fara í undanúrslit ásamt KR, FH og Víkingi og eru áfram í þremur keppnum. Fylkismenn eru úr leik í bikarnum og geta einbeitt sér að deildinni. Vondur dagur Flottur fótboltaleikur tveggja góðra liða en þegar upp er staðið þá má benda á það að Fylkisvörnin gerði sig seka um mistök í þremur mörkum. Bæði vítin gefa þeir í stöðum sem að ekki virtist vera mikil hætta í og svo er fjórða markið vond varnarmennska ofan á það að Aron markmaður hikar á lykilstundu. Dómarinn - 4,0 Einar gerði margt rétt, t.d. alveg klárt að vítin tvö áttu að standa. Auk atviksins sem að hér er tilgreint þá varð mikið hafarí þegar Kolbeinn lét falla orð í garð AD1 sem ekki eiga að heyrast á fótboltavelli og ætti að leiða af sér a.m.k. áminningu. Línan í leiknum hjá tríóinu hefði mátt vera betri, ósamræmi á köflum í hvenær menn flautuðu og hvenær ekki. Held að þeir í alsvörtu búningunum ætli sér betri frammistöðu í næstu verkefnum.