Stjörnumenn fóru betur með færin sín í dag, svo einfalt var það. KR fengu alveg klárlega færi til þess að skora fleiri mörk og áttu fínan kafla þegar staðan var 2-1 þar sem þeir sóttu mikið en eftir að þeir gáfu vítið var brekkan of brött.

Daníel Laxdal spilaði í dag sinn 500. leik fyrir Stjörnuna og allt sem Stjörnumenn gerðu í kring um það var atvikið í dag. Hann var heiðraður fyrir leik, nafnið hans var endalaust sungið í stúkunni, heiðursskipting og ég veit ekki hvað og hvað. Svo var hann heillengi úti eftir leik að tala við litla Stjörnumenn, gefa eiginhandaráritanir og taka myndir.

Stjarnan tekur sterk 3 stig í baráttunni um fjórða sætið og fara þrem stigum fyrir ofan KR og FH.

Kennie Chopart vill líklega gleyma þessum leik sem fyrst. Hann leit ekki vel út í fyrsta marki Stjörnunnar þegar Emil slapp aleinn í gegn og svo var varnarleikurinn hans þegar hann gaf vítið alls ekki eitthvað til að hrópa húrra fyrir.

Mér fannst Elías gera þetta ljómandi vel í dag. Spjaldaði á réttum tímum, hélt ágætis flæði samt sem áður og dæmdi víti sem var klárlega víti. Hef lítið út á hans frammistöðu að setja.