Afturelding sigraði ÍA örugglega

Lið ÍA og Aftureldingar mættust í 15. umferð Pepsi deildar kvenna á Akranesvelli í kvöld.

Bæði lið höfðu til mikils að vinna því botnbaráttan er mikil og mættu bæði lið ákveðin til leiks.
Það voru stúlkurnar úr Mosfellsbænum sem skoruðu fyrsta mark sitt á 6. mínútu þegar Valdís Björg Friðriksdóttir skoraði auðveldlega þegar vörn Skagastúlkna galopnaðist.
Lítið gerðist í fyrri hálfleik og staðan í leikhlé var 0 - 1 fyrir Aftureldingu.

Í seinni hálfleik komu Skagastúlkur ákveðnari til leiks en þegar Helen Lynskey skoraði annað mark fyrir Aftureldingu á 60. mínútu þá var eins og allur kraftur færi úr þeim.
Aftureldingsstúlkur bættu svo við þriðja marki sínu þegar Stefanía Valdimarsdóttir skoraði á 69. mínútu en hún var þá ný komin inná fyrir Valdísi Björgu.
Á 71. mínútu fór Heiðrún Sunna Sigurðardóttir með hendina í andlitið á Guðrúnu Karítas Sigurðardóttir og fékk Heiðrún Sunna rautt spjald og spiluðu Aftureldingsstúlkur því einni færri það sem eftir var leiks.

Lið ÍA er fallið, þær eru með 1 stig í neðsta sæti deildarinnar og Afturelding er í 8. sæti með 10 stig og er því ljóst að mikil spenna verður í síðustu leikjunum en FH er í 9. sæti með 9 stig.