Leikurinn hefði getað dottið hvoru megin sem var. Leiknismenn voru í raun alls ekki lakari aðilinn og hefðu alveg getað skorað. Þeir mættu grimmir til leiks og gáfu ekki þumlung eftir. KR-ingum gekk afskaplega illa að skapa sér færi og það benti í raun fátt til þess að þeir væru að skora fyrr en varamaðurinn Þorsteinn kom með sigurmarkið. Eyjólfur Tómasson, markvörður Leiknis, verður að taka það á sig að hafa ekki varið laust skot Þorsteins. Hann átti klárlega að gera betur. Þetta mark skildi liðin að og úrslitin svekkjandi fyrir Leikni.

KR gekk erfiðlega að skapa sér færi en Þorsteinn Már Ragnarsson kom inn sem varamaður og kom boltanum framhjá Eyjólfi í marki Leiknis.

KR heldur áfram að setja pressu á FH í toppbaráttunni með þessum góða sigri. Leiknismenn stimpla sig alvarlega í fallbaráttuna! Þeir eru ekki nema stigi frá fallsæti núna eftir þokkalega byrjun, það er farið að halla verulega undan fæti hjá þeim og stigasöfnunin stífluð.

Hræðilegur dagur fyrir Eyjólf Tómasson markvörð Leiknis. hann hefur sjaldan verið jafn óöruggur í markinu. Átti klárlega að verja í sigurmarki Þorsteins, var virkilega óöruggur í flestum fyrirgjöfum og kórónar svo lélegan leik með því að láta reka sig út af í blálokin með algerum klaufaskap! Hann vill sjálfsagt gleyma þessum leik sem fyrst!

Valdimar átti fínan leik með flautuna. Leyfði mikið og hélt góðri línu.