Það má frekar segja að heimaliðið hafi verið betra í leiknum í kvöld en það eru mörkin sem telja. Þegar þú ert með Hörpu Þorsteinsdóttur í liðinu þínu þá er líka alltaf von á einu og hún sá til þess að Stjörnuliðið fór með öll þrjú stigin heim í bæinn.

Stjarnan eykur forskot sitt á toppi deildarinnar í bili að minnsta kosti en Breiðablik er að spila þessa stundina. Þór/KA hefði getað blandað sér af fullu afli í titilbaráttuna með sigri en sá draumur fjarlægist eftir þetta tap.

Sandra María Jessen týndist þegar leið á leikinn. Leikmaður eins og hún á að stíga upp í svona mikilvægum leikjum og sýna að hún er einn af bestu leikmönnum landsins.

Bríet Bragadóttir dæmdi leikinn og Akueyringar voru ekkert alltof sáttir með hana á stundum. Þó er það svo að hún réði ekki úrslitum í þessum leik.