Mist Rúnarsdóttir @MistRunarsdotti

Textalýsing Skýrslan Viðtöl

Hvað réði úrslitum? Fókusinn var heilt yfir betri hjá Blikum. Bæði lið byrjuðu sterkt, áttu færi og létu finna fyrir sér í skemmtilegum fyrri hálfleik. Í seinni hálfleik kom betur og betur í ljós að Blikar voru betur gíraðar í verkefnið. Samvinna leikmanna og barátta var til fyrirmyndar á meðan Valskonum gekk illa að tengja saman sendingar og náðu litlum takti í sinn leik. Bestu leikmenn 1. Andrea Rán Snæfeld Andrea Rán átti hrikalega góðan leik á miðjunni hjá Blikum og samvinna hennar og Alexöndru var til fyrirmyndar. Dreifði spili, bjó til sénsa og skoraði svo sigurmarkið úr vítaspyrnu. 2. Sonný Lára Þráinsdóttir Markvörðurinn fær titilinn eftir góða frammistöðu. Valskonur fengu fjölmörg horn og föst leikatriði sem Sonný greip vel inn í . Hún á svo frábæra vörslu undir lok leiks sem fer langleiðina með að tryggja sigur Blika. Atvikið Það voru nokkrir vendipunktar í leiknum. Guðrún Karítas hefði getað náð forystunni fyrir Val strax í upphafi og báðir markverðir eiga góðar vörslur sem halda sínum liðum inni í leiknum. Atvikið hlýtur hinsvegar að vera vítið. Thelma Björk gerir sig seka um slæm mistök þegar hún heldur Alexöndru fastri í teignum í baráttunni um fyrirgjöf. Óvanalegt hjá þessum reynslumikla leikmanni. Andrea Rán fór síðan svellköld á punktinn, sendi Söndru í rangt horn og skoraði eina mark leiksins.

Hvað þýða úrslitin? Blikar halda toppsætinu og sitja þar þegar mótið er hálfnað. Átta sigrar í níu leikjum er ekkert til að kvarta yfir. Frábær árangur hjá ungu og breyttu liði Breiðabliks. Valsarar sáu fyrir sér að komast upp fyrir Blika en sitja áfram í 3. sæti og halda áfram að anda ofan í hálsmálið á Blikum og norðankonum. Vondur dagur Berglind Björg spilaði mjög vel en framherjar eru dæmdir af mörkunum sem þeir skora og landsliðskonan fór ekki vel með sína sénsa fyrir framan markið. Þá voru nokkrar Valskonur í basli. Guðrún Karítas komst lítið í takt við leikinn, Málfríður Anna átti í vandræðum með Öglu Maríu og Arianna var ekki sannfærandi í hafsentinum. Dómarinn - 8 Arnar Þór og félagar voru með allt meira og minna á hreinu.