Magnús Þór Jónsson @maggimark

Textalýsing Skýrslan

Hvað réði úrslitum? Barnalegur varnarleikur ÍBV og taktískar tilfærslur hjá Blikum. Fyrstu tvö mörk Blikanna voru af ódýrara taginu eftir að ÍBV höfðu verið mjög sterkir framan af. Gæðalið eins og Blikar klára svoleiðis verkefni. Bestu leikmenn 1. Aron Bjarnason Frábær í seinni hálfleiknum, eftir að Blikar fóru í 4-3-3 voru fleiri boltar þræddir til hans og hann á tvær stoðsendingar og miklu fleiri góðar sem hefðu getað skapað mörk, hélt áfram eftir frábæra innkomu í Garðabæ. 2. Andri Rafn Yeoman Langmesta lífsmark Blika í fyrri hálfleik, á stóran þátt í fyrstu 2 mörkunum. Gæðaleikmaður sem skiptir miklu máli fyrir Blikaliðið. Atvikið Eyjamenn vildu tvö víti í dag, strax eftir 40 sekúndur fellur Guðmundur í teignum eftir viðskipti upp úr horni og í 2-1 stöðu vilja þeir víti þegar virtist brotið á Castanheira. Úr stúkunni virkaði það klárt leikbrot en þó utan teigs. Stórar ákvarðanir þar á ferð.

Hvað þýða úrslitin? Blikar eru á toppnum um sinn hið minnsta, ÍBV sitja enn neðstir í deildinni eftir 9 leiki. Vondur dagur Ég er ekki viss um að Óskar Elías horfi mikið á úrklippur úr þessum leik, hann gerir sjálfsmark í marki 2 og síðan fer Aron hrikalega með hann í marki númer 3. Stuttu seinna var honum kippt af velli. Dómarinn - 7,0 Heilt yfir var leiknum vel stjórnað af dómaratríóinu en þessi stóru atvik skipta máli. Klárt mál að a.m.k. leikbrot var á 72.mínútu sem hefði getað skipt máli í leiknum, þar átti Jóhann að flauta.