Smávægileg mistök HK manna sem fengu ofboðslega harða refsingu þegar 6 mínútur voru komnar af uppbótartíma. Ein misheppnuð sending í sókn heimamanna étin, langur bolti upp völlinn bauð Birni Snæ upp í dans sem hann þáði.

Þetta mark sem skildi í lokin stendur uppúr mjög bragðdaufum leik. Birnir Snær hefur alls ekki náð sér í gang hjá Val en það vita allir hvaða gæði búa í honum sem leikmanni og þegar hann fékk boltann var mikið verk óunnið þegar hann æddi af stað á vörn HK og klíndi boltann í fjær með síðustu snertingu leiksins. Ferskjuskot (peach of a shot) ef eitthvað svoleiðis er til.

Valsmenn eru komnir "á fyrri blaðsíðuna" í PepsiMax-deildinni með þessum sigri, lyfta sér upp í 6.sætið. HK eru enn í næstneðsta sæti, 2 stigum frá öruggu sæti.

Bakverðir Vals eru sannkallaðir gæðaleikmenn, ótrúlega reynslumiklir og hafa unnið titla. Það er örugglega ósanngjarnt að pikka þá út í þetta horn hér hjá okkur á .net en það er líka gert vegna þess hversu háa standarda þeir hafa sett á sjálfa sig. Það er orðið erfiðara hjá þeim félögum Bjarna og Birki að fara fram og til baka upp vængina og alltof mikið af sendingasénsum fóru illa. Þegar þeir hrökkva í gamla gírinn mun endurreisn Vals fara enn ofar held ég.

Óskaplega rólegur leikur að dæma hjá Pétri og félögum. Hélt línu í gegnum leikinn að mestu en þegar ekki verða nein stór atvik þá fær maður nú ekki meira en þetta í einkunn. Þægilegur dagur á dómaraskrifstofunni.