Elvar Geir Magnússon @elvargeir

Textalýsing Skýrslan

Hvað réði úrslitum? Baráttuglaðir HK-ingar létu sverfa til stáls. Voru grimmir í varnarleiknum og nýttu réttu tækifærin til að refsa. Blikar voru mun meira með boltann en það vantaði meira upp á hjá þeim. Bestu leikmenn 1. Atli Arnarson - HK Tvö mörk frá Atla í 2-1 sigri. Auðvelt val! 2. Ásgeir Börkur Ásgeirsson - HK Þvílík þeytivinda á miðjunni hjá HK. Hann naut sín í botn í kvöld og hefur verið hrikalega öflugur í síðustu leikjum. Leifur Andri og Arnar Freyr ættu líka skilið að fá bónusstig. Atvikið Fyrri deildarviðureign þessara liða endaði 2-2 þar sem Blikar skoruðu á 89. mínútu og í uppbótartíma. Þegar þeir minnkuðu muninn á 89. mínútu í kvöld varð hjartsláttur HK-inga örari! HK hefur verið í því að missa leiki úr höndunum í lokin en nú náðu þeir að halda út!

Hvað þýða úrslitin? Hrikalega dýrmætur sigur HK-inga sem hafa því tekið fjögur stig af grönnum sínum í sumar. Breiðablik er sjö stigum frá KR sem er í efsta sæti. Á einu augabragði eru Íslandsmeistaravonirnar í Kópavogi skyndilega orðnar sáralitlar. Vondur dagur Thomas Mikkelsen er að koma sér í færin en hann verður að fara að nýta þau betur. Misnotuð færi hjá honum eru að reynast Blikum ansi dýrkeypt. Færanýtingin hjá Blikum var hræðilega slök í kvöld. Dómarinn - 7 Hélt sinni línu vel í leiknum og hafði góða stjórn. Breiðablik hefði mögulega getað fengið vítaspyrnu í uppbótartíma þegar boltinn fór í hendina á Ásgeiri Berki. Mér sýndist þetta vera víti og það lækkar einkunn Guðmundar.