Mist Rúnarsdóttir @MistRunarsdotti

Textalýsing Skýrslan Viðtöl

Hvað réði úrslitum? Blikaliðið mætti mjög vel stemmt og einbeitt til leiks og það var aldrei spurning hvort liðið færi með sigur. Laskað Fylkislið varðist ágætlega í fyrri hálfleik og hætti aldrei að reyna að spila sinn fótbolta en það var alls ekki nóg í dag gegn Blikum í stuði. Hver einasti leikmaður Breiðabliks skilaði sínu vel og sigurinn fyllilega verðskuldaður. Bestu leikmenn 1. Karólína Lea Vilhjálmsdóttir Karólína Lea lék virkilega vel í dag. Var mjög ógnandi á hægri kantinum og lagði upp þrjú mörk. 2. Alexandra Jóhannsdóttir Það er svosem erfitt að taka út leikmenn úr flottu Blikaliðinu en Alexandra lék mjög vel á miðjunni. Bjó til færi fyrir liðsfélagana og skoraði tvö mörk. Atvikið Blikar ætluðu ekki að lenda í sama brasi og í bikarleiknum fræga og voru fljótar að brjóta ísinn. Það var ekki aftur snúið eftir að Berglind Björg kom Breiðablik yfir strax á 5. mínútu.

Hvað þýða úrslitin? Blikar eru áfram í 2. sæti, með jafnmörg stig og Valur en lakari markatölu. Fylkisliðið fer hinsvegar niður í 8. sæti og er nú aðeins stigi fyrir ofan botnliðin HK/Víking og KR. Það er gríðarlega spennandi barátta framundan, bæði á toppi og botni deildarinnar. Vondur dagur Það er meiðslabras í Árbænum og Kjartan þjálfari var ekki með nema tvo leikfæra leikmenn á bekknum. Hann átti því fá vopn til að bregðast við sóknarþunga Breiðabliks þegar líða tók á leikinn og hans leikmenn voru sumar hverjar orðnar ansi þreyttar. Þá gekk liðunum ekki vel að nýta hornin sín en aðeins eitt mark var skorað úr 19 hornspyrnum í leiknum! Dómarinn - 6,5 Gunnar Freyr gerði ein klaufaleg mistök þegar hann var of fljótur á sér og flautaði aukaspyrnu úti á miðjum velli í stað þess að beita hagnaði þegar Karólína Lea var sloppin í gegn. Fyrir utan það hélt tríóið vel utan um leikinn sem var tiltölulega auðveldur að dæma.