Þetta var skemmtilegur leikur með fullt af færum á báða bóga. Sanngjörn úrslit en sigurinn hefði getað dottið hvoru megin sem var. Það vantaði upp á færanýtingu beggja liða og það er bara það sem ræður þessum úrslitum.

Það var nóg að gera í leiknum og mikið fjör báðum megin á vellinum. Jöfnunarmark Keflavíkur fimm mínútum fyrir lok venjulegs leiktíma var svekkjandi fyrir HK/Víking en sanngjarnt fyrir Keflavík sem hafði átt nokkur dauðafæri áður en þær náðu að skora.

Keflavík kemst í 10 stig, jafnar KR og Stjörnuna að stigum og kemst upp í 5. sætið vegna markatölu. HK/Víkingur jafnar Fylki að stigum og fer upp fyrir þær í 9. sætið, einnig vegna markatölu. Það er þéttur pakkinn frá 5. sæti niður í botnsætið en aðeins munar 3 stigum.

Simone Emanuella Kolander í liði HK/Víkings var oft á tíðum komin í góð færi en var að taka of margar snertingar og hefði oft átt að gera betur. Í liði Keflavíkur var þetta ekki alveg að detta með Anítu Lind í kvöld. Hún var að staðsetja sig vel og átti í síðari hálfleik nokkur tækifæri fyrir framan markið þar sem hún hitti boltann illa.

Dómarinn var ekkert spes í kvöld. Tríóið í heild sinni virtist óöruggt og ekki sannfærandi í ákvarðanartökum.