Leiknir var betra liðið í dag og unnu sanngjarnan sigur. Vuk Oskar Dimitrijevic var algjörlega frábær, skoraði tvö mörk og lagði upp eitt. Það er virkilega gaman að fylgjast með honum. Framlína Leiknis var líka mjög góð í dag. Sólon Breki, Sævar Atli voru að allan leikinn og gerðu varnarmönnum Fram lífið leitt. Máni Austmann er líka síógnandi og skoraði gott mark. Framarar héldu boltanum vel í dag en það vantaði að skapa meira af alvöru færum. Þeir söknuðu Fred gríðarlega í dag. Hann skapar mjög mikið af góðum stöðum og dregur mikið að sér. Albert Hafsteinsson var tekinn út af í stöðunni 2-4 og mörgum fannst það svolítið skrítin skipting.

Fyrsta mark leiksins var frekar skrautlegt. Fréttaritara sýndist vera brotið á Ólafi Íshólm þegar hann stekkur upp til að handsama knöttinn en á myndbandi sést að hann keyrir í raun í Hlyn Atla Magnússon samherja sinn og missir knöttinn frá sér. Klaufalegt mark sem setti leikinn svolítið úr skorðum fyrir Framara.

Leiknir kemst aftur á sigurbraut og eru komnir upp í þriðja sætið. Fram tapar sínum fyrsta leik á tímabilinu og eiga hörkuleik gegn Grindavík á útivellí í næstu umferð.

Þórir Guðjónsson og Alexander Már Þorláksson voru í svolitlu basli í framlínunni. Voru mjög iðnir en fengur úr mjög litlu að moða.

Aðalbjörn stóð sig ágætlega. Maður tók lítið eftir honum í leiknum. Það er yfirleitt merki um að dómarinn sé að gera ágætis hluti.