Upphaf leiksins skrifaði handritið. KR-ingar komu æðandi upp úr startblokkunum eftir níu daga hlé þar sem leikmenn fengu m.a. þriggja daga frí og fóru í sveitina að sögn Rúnars þjálfara. Tvö mörk á fyrstu tíu mínútunum var munur sem Blikar náðu ekki að yfirvinna.

Fyrsta mark leiksins var sannkallað konfekt og setti leikinn í farveg. Stefán Árni fékk boltann 50 metra frá marki, fór framhjá nokkrum leikmönnum Blika og lagði hann yfirvegað í fjærhorn. Sannkallað draumamark.

KR eru fyrstir til að leggja Blika í sumar og fara yfir Kópavogsbúa í 2.sæti, bara markatölunni á eftir Fylki. Blikar detta í 3.sæti deildarinnar.

Frábær fótboltaleikur sem bauð upp á eiginlega allt og sannarlega fáar vondar frammistöður. Bakverðir Blika litu illa út í fyrri hálfleik þar sem KR fóru mikið á bakvið þá, sérstaklega fór Atli illa með Davíð. Setjum vonskuna á þá...en þeir stigu vel upp í síðari hálfleik.

Flott frammistaða tríósins. Einar leyfði spjöldunum lengi að vera í vasanum í leik sem bauð upp á mörg leikbrot. Hann hélt línunni vel og allt undir styrkri stjórn. Dómari vill að fáir muni eftir frammistöðu hans eftir leik held ég...og Einar var á þeim stað eftir leikinn.