KA menn komu boltanum í netið. Það var lengst af mikið jafnræði með liðunum og ekki tomma gefin eftir. Bæði lið fengu færi til þess að klára leikinn, en það var ekki fyrr en á 91. mínútu sem að Steinþór Freyr stangaði sendingu Guðmundar Steins í netið af stuttu færi og tryggði stigin þrjú fyrir KA.

Sigurmarkið. Það ætlaði allt um koll að keyra þegar að Steinþór skallaði boltann framhjá Hákoni. Það virtist sem enn eitt jafnteflið ætlaði að líta dagsins ljós á Greifavelli, en Steinþór sá til þess að svo færi ekki.

KA lyfta sér upp í 9. sætið með sex stig á meðan Grótta situr eftir í því 11. með fjögur stig. Það er þungu fargi létt af norðanmönnum, þar sem að þeir voru í leit að sínum fyrsta sigri. Grótta létu þá hafa fyrir hlutunum og hefðu hæglega getað farið með stigin þrjú heim í Seltjarnarnes. KA fer í Kaplakrika og mætir FH í miðri viku, en Gróttumenn taka á móti Víkingi R.

Ég get í raun ekki bent á eitt né neitt. Þetta var góður fótboltaleikur og enginn sem átti áberandi slæman dag.

Hafði góð tök á leiknum og lét hann fljóta ágætlega. Hefði mögulega getað flautað víti á Mikkel Qvist þegar hann átti í kapphlaupi við Axel.