Fyrri hálfleikur var nokkuð jafn en KR-ingar sköpuðu sér mun hættulegri færi. Friðrika í marki Þróttar varði vel í tvígang og staðan því jöfn þegar flautað var til hálfleiks. Þróttarar voru svo sterkari í síðari hálfleik og eftir öfluga innkomu varamannanna Ólafar Sigríðar og Leu Bjartar leit út fyrir að gestirnir ætluðu að taka stigin þrjú. Það voru hinsvegar aðrir varamenn sem tóku málin í sínar hendur og þær Inga Laufey og Hlíf Hauks bjuggu til jöfnunarmark fyrir KR í uppbótartíma. Eigum við því ekki að segja að varamennirnir hafi haft mikil áhrif á úrslit leiksins í kvöld?

Það er ekki hægt að líta framhjá gríðarlega mikilvægu jöfnunarmarki Hlífar Hauksdóttur í uppbótartíma. Vel klárað og KR-ingar áfram taplausar eftir kví. Flottasta mómentið var þó líklega sprettur nýliðans Angelu yfir allan völlinn til þess að bjarga á marklínu. Fótboltaútgáfan af varnarvinnunni hans Alexander Petersson á EM 2010.

Liðin deila með sér stigunum og eru bæði heldur súr með niðurstöðuna. KR-ingar eru í 9. sæti deildarinnar með 4 stig. Geta litið á björtu hliðarnar en þær eru enn taplausar eftir sóttkví og eiga leik til góða á liðin í kringum sig. Þróttarar gera þriðja jafnteflið sitt í röð í deildinni. Eru komnar í 6 stig, rétt eins og ÍBV, Stjarnan og Þór/KA.

Mary Alice Vignola hefur farið á kostum í upphafi Íslandsmóts en hún varð fyrir því óláni að meiðast í upphitun og gat ekki spilað í dag. Vont fyrir hana og Þróttara sem söknuðu hennar, sérstaklega framan af leik. Dagurinn endaði líka illa fyrir Lindu Líf Boama sem fór meidd af velli, líklega viðbeinsbrotin.

Fín frammistaða hjá dómurunum sem héldu línu allan leik. Leikmenn fengu að takast á úti á velli og leikurinn flaut þokkalega. Bæði lið vildu víti en ég held að tríóið hafi verið með allt sitt á hreinu í þeim atvikum.