Leikurinn var kaflaskiptur og Fylkir var heilt yfir betra liðið. Það hjálpaði þeim að vera manni fleiri í heilan hálfleik.

Byrjunin á seinni hálfleik var mjög skrítin. Þegar Jóhann Atli Hafliðason dómari flautaði til leiks vantaði einn leikmann í lið Þórs/KA, Huldu Karen Ingvarsdóttur, svo aðeins 10 voru inná hjá þeim. Hulda sást svo sitja í tröppunum upp að vellinum og njóta aðhlynningar þar. Arna Sif fyrirliði sagði svo eftir leik að Hulda Karen hafi ælt í hálfleik og gat ekki haldið leik áfram. Sendum henni batakveðjur.

Fylkir fer upp í 3. sætið fyrir ofan Selfoss sem tapaði sínum leik í dag. Þær eiga í raun ekki mikinn séns á að fara ofar í deildinni því það eru 8 stig í Breiðablik í 2. sætinu sem á auk þess leik til góða. Þór/KA er hinsvegar komið í slæm mál. Liðið er aðeins með 11 stig úr 12 leikjum og eftir leiki dagsins aðeins tveimur stigum frá fallsæti. Þær verða að rífa sig upp.

Margrét Árnadóttir virðist hafa látið skapið fara með sig í upphafi seinni hálfleiks þegar hún fékk rautt spjald eftir samskipti sín við Cecilíu Rán Rúnarsdóttur markvörð Fylkis. Fólki ber ekki alveg saman hvort hún hafi sparkað í, slegið eða gefið olnbogaskot en hvað sem það var þá ákvað Jóhann Atli dómari að sýna henni beint rautt spjald og liðsfélagarnir manni færri næstum heilan hálfleiik.

Fínn leikur hjá Jóhanni Atla en þó eitt stórt vafaatriði sem hafði ekki áhrif á úrslit leiksins þegar Þór/KA skoraði annað mark sitt úr aukaspyrnu frá miðju og Fylkisliðið taldi brotið á markverði sínum. Hann lét markið samt standa og ég var of langt frá til að dæma um hvort það hafi verið rétt.