Það er mikil jákvæð ára yfir Fram liðinu sem smitast út í leikgleðina hjá þeim í sumar. Hópurinn er mjög breiður og liðið veikist ekki við skiptingar. Gestirnir voru andlausir og sýndu ekki þann baráttuanda sem búist var við af Þórsurum í dag.

Atvikin í þessum leik eru tvo og þau eru bæði skiptingar sem vert er að minnast á. Sú fyrri var á 63. mínútu þegar Alexander Már Þorláksson kom inná í lið Fram. Þar með spilaði hann í fyrsta sinn í meistaraflokki með Indriða Áka tvíburabróður sínum, og í raun í fyrsta sinn síðan í 3. flokki. Hitt atvikið er svo á 76. mínútu þegar Danny Guthrie kom inná í fyrsta sinn með Fram. Þessi fyrrverandi leikmaður Liverpool og Newcastle gekk óvænt til liðs við félagið í lok gluggans. Hann virkaði ekki í nógu góðu standi en segja mér fróðari menn að hann sé í einkaþjálfun til að koma sér í stand til að geta spilað meira. Hann var samt góður á boltann og virtist virkilega sterkbyggður og erfitt að ýta við honum. Verður gaman að sjá hann í sumar.

Framarar ætla ekki að láta það gerast aftur eins og í fyrra að missa af sæti í Pepsi Max-deildinni. Þeir byrja þetta mót á miklu flugi með fullt hús stiga eftir fyrstu þrjá leikina. Gestirnir í Þór hafa fengið þrjú stig en það er hellingur eftir af þessu móti, 19 leikir!

Daði Freyr Arnarsson kemur á láni til Þórs rétt fyrir tímabilið úr toppliði FH í Pepsi Max-deildinni. Það er ekki langt síðan hann var orðinn aðalmarkvörður FH fyrir tveimur árum. Þegar markvörður að þessu kaliberi kemur í Lengjudeildina þá á hann að koma til að vinna leiki fyrir liðið. Það sem af er mótinu hefur hann fengið á sig 8 mörk í þremur leikjum. Hann þarf að stíga upp og verða sigurvegari fyrir Þór.

Alls ekki erfiður leikur að dæma fyrir Aðalbjörn Heiðar, engar erfiðar ákvarðanir sem hann þurfti að taka en hann leysti það allt listilega vel. Hafði góða stjórn á leiknum og ekket út á hann að setja.