Taktísk barátta tveggja öflugra liða, menn tóku ekki stórar áhættur, eftir fyrsta mark leiksins frá KR stigu Blikar upp og jöfnuðu að lokum. Eftir það voru bæði lið varkár og í lokin líklega bæði sátt við stigið.

Dauðafæri Blika í uppbótartíma, eftir frábært upphlaup Kristins Steindórssonar var hann í frábæru færi af vítapunktinum en skaut framhjá þegar hann hefði getað stolið stigunum þremur.

Blikar lyfta sér upp í 2.sætið og uppfyrir Víkinga á markatölu, 4 stigum á eftir toppliði Vals með einn leik til góða. KR eru áfram í 4.sæti, nú stigi á eftir bæði Víking og Blikum.

Kristján Flóki hefur átt betri daga, braut klaufalega af sér snemma og þegar Blikar ná yfirhöndinni um tíma í síðari hálfleik átti hann erfitt með að verjast í kantframherjastöðunni. Kannski pínu ósanngjarnt að setja þetta á hann því hann er auðvitað miklu vanari að vera nían í liðinu. Svona er þetta samt, lítil miskunn í boltanum sko!

Erlendur er öflugur leikstjórnandi með flautuna og var það einnig í kvöld, óhræddur við að veifa spjöldum og hélt línu eiginlega allt til loka. Hefði þó líklega átt að skella spjaldi á Blikana í lokin þegar þeir duttu þar í minniháttar peysutog í tvígang til að tefja KR. Það var þó umdeilanlegt og þessum leik stjórnað af yfirvegun og festu hjá dómarateyminu. Til sóma.