Aftur, annan heimaleikinn í röð, lenda Leiknismenn kannski í því að fá ekki það hrós sem þeir eiga skilið. Stjarnan átti virkilega dapran dag og ógnaði heimamönnum ekkert að ráði. Leikurinn var mjög lagður upp hjá heimamönnum og var dæmið klárað í fyrri hálfleik.

Seinna markið í raun innsiglar leikinn. Ósvald gaf boltann á Emil sem teiknar boltann á fjærstöngina þar sem Hjalti hangir í loftinu og skallar boltann í netið.

Stjarnan er áfram á fallsvæðinu en Leiknir færist fjær pakkanum. Jákvætt fyrir Leikni að næsti leikur er einnig á heimavelli. Stjarnan þarf að ýta þessu til hliðar og endurstilla sig fyrir næsta leik.

Flestallir leikmenn Stjörnunnar voru lélegir en Einar Karl var sennilega sá sem þjálfarar gestanna voru hvað ósáttastir með miðað við hróp og köll í fyrri hálfleik. Liðsvalið var eitthvað skrítið, einn gír í mönnum og enginn að ógna. Það þarf að koma Eggerti inn í þetta lið og það vantaði karakterinn sem er í Eyjólfi. Ekki veit ég svo hvað Tristan gerði til að verðskulda þessa bekkjarsetu.

Vel dæmt hjá Helga. Ég sá ekki hvernig Máni fór í Brynjar Gauta og er það sennilega eina vafaatriði leiksins hvort Máni hafi átt að fá meira en gult.