Kórdrengir nýttu færin sín betur, það er alveg ljóst. KV klúðrar víti sem var dýrkeypt í stöðunni 1-0. KV fékk tækifæri til að skapa betri færi en vantaði oft eina til tvær sendingar upp á til að binda endahnútinn á sóknir sínar. Svo áttu þeir skot í og við teigin sem voru ekki nægilega hnitmiðuð eða of laus til að komast í gegnum Daða í markinu. Það má því segja að leikurinn hafi ráðist á nýtingu liðanna.

Ingólfur Sigurðsson klúðraði víti í stöðunni 1-0 fyrir Kórdrengjum. Hefði mjög líklega gefið KV meiri kraft og trú á að ná í fyrsta sigurinn.

Kórdrengir með tvo sigra í þremur leikjum sem er jákvætt fyrir þá og gefur þeim aukna trú á framhaldinu. KV sýnir það enn og aftur að þeir geta spilað vel sín á milli og búið til sóknir en það er enn eitthvað sem vantar í þeirra leik til að ná í sigur. Vonandi fyrir þá gerist það sem fyrst því annars þyngist róðurinn í deildinni.

Ingó Sig tekur þetta á sig útaf vítaklúðrinu. Spilaði fínt úti á velli en vantaði eitthvað upp á til að skapa færi fyrir sitt lið.

Arnar dæmdi leikinn ágætlega. Það voru einhver atvik sem hægt væri að skoða betur. Á heildina litið gerði hann vel og var með fín tök á leiknum. Leikmenn beggja liða báðu um hitt og þetta en Arnar Þór hélt stjórn á leiknum.