Gæði Blika og sá vani að vinna leiki. Þeir höfðu kraftinn og sigurviljann sem þurfti. Ekki það að heimamenn hafi ekki haft hann líka en það er einhver ára yfir Blikum og maður trúir því að þeir muni vinna þá leiki sem þeir eru í jafnvel þó að á móti blási. Lentu í mótvindi í dag en sýndu karakter og kraft og komu til baka og tryggðu sér þrjú stig þó vissulega hafi þau staðið tæpt.

Erfitt að líta framhjá vítadómi í blálokinn. Deildar meiningar um réttmæti hans en frá þeim myndum sem ég hef séð er vel hægt að réttlæta víti en mögulega má líka réttlæta að sleppa því.

Blikar auka forskot sitt á Víkinga aftur í 6 stig og sitja á toppi deildarinnar. Keflavík heldur 6.sætinu til morguns hið minnsta en gæti misst KR fram úr sér vinni Vesturbæjarliðið sigur gegn Fram.

Sýndist það vera Ernir Bjarnason sem braut á Ísaki þegar vítið var dæmt. Menn geta deilt um réttmæti þess dóms en hvort heldur sem er hlýtur tilfinningin að vera ömurleg að fá dæmt á sig víti á þessum tímapunkti í jöfnum leik. Fylgir honum pottþétt á koddann og langt inn í nóttina.

Mér fannst Jóhann hafa ágæt tök á leiknum í dag. Hiti fór að færast í leikinn þegar leið á en hann hélt ró sinni og línu og tókst nokkuð vel til. Vítið er mögulegt spurningamerki en ef bókin segir víti þá er lítið hægt að kvarta.