Fylkir var 3-0 yfir í hálfleik og stjórnuðu leiknum frá a-ö. Það var í raun það sem skóp þennan mikilvæga sigur þeirra. Það var ekkert útlit fyrir að Selfoss væri hreinlega að fara skora í leiknum en gæði Gary Martin kom þeim á bragðið. Þeir minnkuðu svo muninn niður í eitt mark þegar það voru ennþá 30 mínútur eftir af leiknum. Fylkir svaraði þessum uppgangi Selfyssinga með marki einungis þremur mínútum seinna þegar Birkir Eyþórsson bætti við öðru marki sínu og fjórða marki heimamanna. Síðasta mark leiksins skoruðu Selfyssingar í uppbótartíma. Það dugði hinsvegar ekki til að fá stig út úr leiknum og þar við sat 4-3

Mark Gary Martin í upphafi seinni hálfleiks var glæsilegt og kom Selfyssingum inn í leikinn, sem á endanum gerði leikinn aðeins meira spennandi en hann var í fyrri hálfleik.

Fylkir kom sér fyrir á toppi deildarinnar með 39 stig, tveimur stigum meira en HK. Selfoss siglir lygnan sjó um miðja deild áfram.

Varnarleikur Selfoss í heild sinni var hrikalega slappur. Það leit hreinlega út fyrir að þeir höfðu ekki áhuga á að gera nokkurn skapaðan hlut í fyrri hálfleik, voru langt frá boltamanni og dekkuðu illa. Það var ekki þeim að þakka að staðan var ekki verri í hálfleik.

Vilhjálmur Alvar Þórarinsson gerði sennilega mjög fá misstök í leiknum og var með góða stjórn á honum.