Baldvin Már Borgarsson @BaldvinBorgars

Textalýsing Skýrslan Viðtöl

Hvað réði úrslitum? Blikar voru heilt yfir talsvert sterkari aðilinn í leiknum, hefðu getað skorað miklu fleiri mörk en sóknarleikurinn var ekki upp á sitt besta hjá Víkingunum. Bestu leikmenn 1. Ingvar Jónsson - Víkingur Að markvörður tapliðsins sé besti maður leiksins segir allt sem segja þarf um gang mála, Ingvar var ekkert minna en stórkostlegur, kom í veg fyrir að Ísak Snær myndi blanda sér í baráttuna um gullskóinn. 2. Ísak Snær - Breiðablik Þrátt fyrir að hafa klúðrað öllum þeim færum sem hann gerði þá var það oftar meira til þess komið hvað Ingvar gerði vel frekar en Ísak illa, hinsvegar gerði Ísak ótrúlega vel í því að koma sér í öll þessi færi og að taka vald á boltanum í fremstu línu og skapa færin fyrir sjálfan sig og aðra, illviðráðanlegur að öllu leyti í dag. Atvikið Verð að setja lokakaflann hjá Jasoni Daða hérna, kemst einn í gegn frá miðju með Ingvar langt frá markinu en setur boltann framhjá með lélegu skoti af löngu færi, Víkingar taka markspyrnuna stutt og Jason vinnur boltann í þröngri stöðu en með markið galopið aftur og setur hann í hliðarnetið, hvernig Jason minn skoraði ekki í þessum sénsum er rannsóknarefni en hann þarf þó ekki að naga sig neitt í handarbökin enda lyfti hann titlinum örfáum mínútum seinna.

Hvað þýða úrslitin? Blikar eru eðli málsins samkvæmt íslandsmeistarar eins og var svosem löngu vitað, Víkingar enda í þriðja sætinu. Vondur dagur Helgi Guðjónsson var ekki upp á sitt besta í dag og var tekinn af velli í hálfleik, var að spila óvenjulega stöðu hægri vængbakvarðar sem kannski var honum enginn greiði en hann var bæði í vandræðum með að verjast Degi Dan og Davíð Ingvars auk þess að gera eitthvað af viti í kringum markið, sem er hans helsti styrkleiki. Dómarinn - 9 Mér fannst þetta mjög vel dæmdur leikur hjá Ella og hans teymi í mjög erfiðum leik, ég er enganveginn með það á hreinu hvort Blikar hefðu átt að fá víti frekar en aukaspyrnu þegar Dagur Dan var felldur í fyrri hálfleik, en rauða spjaldið er rétt sem og öll spjöldin sem fóru á loft í þessum mikla hitaleik.