Byrjum á því að hrósa liði Keflavíkur sem leikinn frá upphafi til enda hafði fulla stjórn á aðstæðum. Skipulagið hélt vel og þær voru yfirvegaðar en beinskeyttar í sínum sóknaraðgerðum. Auðvitað jókst pressan eftir því sem leið á leikinn en skipulagið hélt og til marks um það átti Selfoss liðið ekki eitt einasta skot sem Vera Varis markvörður Keflavíkur þurfti að verja.

Sigurmarkið, Keflavík vinnur boltann á miðjum vellinum og brunar beint í átt að marki. Sandra Voitane finnur Linli Tu sem sér að Idun er framarlega í markinu og lætur bara vaða og boltinn syngur í netinu. Svekkjandi mark að fá á sig en frábær hugsun og enn betri framkvæmd hjá Linli

Keflavík fer í sjö stig og lyftir sér upp í fimmta sæti deildarinnar í það minnsta til morguns. Selfoss enn með fjögur stig og situr í áttunda sæti.

Sóknarleikur Selfoss hefur séð betri daga. Komust ekkert áleiðis gegn skipulögðu liði Keflavíkur sem að mættu þeim framarlega og hirtu upp alla lausa bolta hvar sem þeir féllu til á vellinum.Sennilega bara einn af þessum dögum þar sem ekkert var að fara að ganga upp.

Reynir Ingi Finnsson átti bara fínan leik í dag, man ekki til þess að hann hafi slegið feilnótu í dómgæslu dagsins og rekur hreinlega ekki minni til þess að bekkirnir hjá liðunum hafi nokkuð kvartað. Nema þá kannski eftir uppbótartíma en það telst nú eðlilegt að bæta aukalega við eftir að hafa spjaldað tvívegis fyrir tafir.