Ofboðslega kaflaskiptur leikur en þegar allt er talið saman er jafntefli sanngjörn niðurstaða. Liðin skiptust á að ráða ferðinni. Annað markaregn þessara liða á stuttum kafla en KR vann 4-3 þegar þessi lið mættust í liðnum mánuði. Er frekja að biðja um að þessi lið mætist í hverri viku?

Jöfnunarmark KR í 3-3 var nokkuð kostulegt. Hreinsun varnarmanns Fylkis, boltinn í andlit Elmars og inn. Fylkismenn í stúkunni kölluðu eftir hendi en Elmar fullyrðir að þetta hafi verið andlitið. Við trúum honum.

Liðin eru hlið við hlið í 7. og 8. sæti og bæði með ellefu stig. Þau eiga það sameiginlegt að vera að rétta úr kútnum og byrjuð að safna stigum eftir mjög erfiða byrjun á mótinu.

Þetta var skemmtilegur fótboltaleikur sem bauð upp á ansi mörg einstaklingsmistök. Báðum liðum fannst mörkin sem þau fengu á sig ansi ódýr. Erfitt að taka einhvern einn út, mistökin komu úr öllum áttum.

Í svona skemmtilegum leik nenni ég ekki að kryfja dómgæsluna of mikið. En þess má geta að tveir dómarar dæmdu leikinn, Einar Ingi fór meiddur af velli og varadómarinn Twana Khalid Ahmed flautaði síðustu 20 mínúturnar. Fyrsti leikur hans í efstu deild karla og vonandi sjáum við meira af honum á því sviði.