Guðmundur Aðalsteinn Ásgeirsson @gummi_aa

Textalýsing Skýrslan

Hvað réði úrslitum? Víkingar nýttu sín tækifæri vel í fyrri hálfleiknum og virtust vera með góða stjórn á því hvað þeir voru að gera í seinni hálfleik, allavega seinni hluta seinni hálfleiksins. Blikar lágu svolítið á gestunum snemma í seinni hálfleiknum og voru óheppnir að skora ekki fyrr. Þegar fyrra markið kemur hjá Blikum þá sprengist leikurinn upp og manni leið eins og annað markið myndi koma. Víkingar urðu stressaðir og Blikar gripu gæsina. Þetta var ótrúlegar senur og auðvitað líka lætin eftir að flautað var af, það var ótrúlegt að fylgjast með því. Maður veit eiginlega ekki hvað maður á að hugsa eftir svona leik. Það hefur mikill rígur myndast á milli þessara tveggja liða síðustu árin og það er svo ótrúlega skemmtilegt fyrir íslenskan fótbolta. Það eru miklar tilfinningar í þessu og það er gaman, það kryddar og lífgar upp á fótboltasumarið. Bestu leikmenn 1. Nikolaj Hansen (Víkingur R.) Gerði frábærlega í báðum mörkum Víkinga og var gríðarlega öflugur sem fremsti maður þeirra. 2. Höskuldur Gunnlaugsson (Breiðablik) Fyrirliðinn dreif Blika áfram og var þeirra skásti maður framan af. Hann leggur svo upp bæði mörkin hjá Bliku, og gerir sérstaklega vel í seinna markinu. Atvikið Það er klárlega jöfnunarmarkið, það sem allir eru að tala um. Þvílík dramatík! Víkingar eru brjálaðir að Ívar Orri hafi ekki verið búinn að flauta af þar sem uppgefinn uppbótartími var búinn en Blikar skilja að tíma hafi verið bætt við eftir að þeir skoruðu. Það má ræða þetta fram og til baka, það eru miklar tilfinningar í þessu

Hvað þýða úrslitin? Víkingur eru með fimm stiga forskot á Val og Breiðablik. Toppbaráttan er gríðarlega spennandi. Óskar Hrafn, þjálfari Blika, segir að Víkingar fari á koddann í kvöld vitandi það að Íslandsmeistararnir séu á eftir þeim. Vondur dagur Stefán Ingi Sigurðarson átti að skora í þessum leik, hann fékk mjög góðar stöður og færi til að gera það. Arnór Sveinn átti líka frekar erfiðan dag varnarlega. Hann var ekki á sínum besta degi. Víkingar eru svo bara klaufar að missa þetta frá sér í uppbótartímanum og miðað við þá stöðu sem var lengi vel í leiknum, þá líta þeir á þetta sem vondan dag. Dómarinn - 4 Ívar Orri og hans teymi áttu líka ekkert sérstakan dag fannst mér, en þetta var mjög erfiður leikur að dæma. Það sem pirraði mig mikið var að Ívar var að taka mörg löng tiltöl og var mikið að ræða málin og það drap tempóið niður á löngum köflum. Það var nokkuð um skrítnar ákvarðanir eins og til dæmis þegar Danijel Dejan Djuric fékk gult fyrir 'leikaraskap' en það var alltaf brot á Damir og mögulega rautt spjald. Halldór Smári átti þá að fá tvö gul spjöld að mínu mati. Víkingar voru brjálaðir að hann hafi bætt við tíma við uppbótartímann en ég skil þá ákvörðun þar sem Blikar skoruðu mark í uppbótartímanum. Heilt yfir þá átti Ívar ekki sérstakan dag. Hættum að lækka tempóið, áfram með leikinn!