Blikarnir lágu í sókn næstum allan leikinn og þá sérstaklega í seinni hálfleik en inn vildi boltinn ekki. Þær fengu færi eftir færi, horn eftir horn, en allt kom fyrir ekki.

Markið sem var dæmt af Blikunum var það fyrsta og eina sem mér datt í hug sem eitthvað sérstakt atvik. Það var bara dæmigert fyrir þennan leik hjá Blikum sem var ekki ætlað að skora í dag.

Þetta eina stig gerir meira fyrir ÍBV heldur en Breiðablik. ÍBV heldur sér fyrir ofan Keflavík á þessu eina stigi og fer upp fyrir Tindastól á markatölu. Blikar geta hins vegar verið 5 stigum á eftir Völsurum í lok dags ef þær klára sinn leik í dag.

Færanýting Blika í dag var alls ekki góð eins og hefur komið fram. Katrín, Linli og fleiri fengu svo sannarlega færi til þess að koma Blikunum í forystu en þær annað hvort hittu ekki boltann eða markið. Guðný í markinu þurfti aldrei að hafa neitt sérstaklega mikið fyrir vörslunum sínum sem voru þó nokkrar.

Mér fannst Bríet og teymið gera þetta vel í dag. Eina sem gæti mögulega verið vafaatriði var markið sem var dæmt af Blikunum vegna rangstöðu en undirrituð er ekki búin að sjá það aftur og getur því ekki sagt til um það.