ÍBV elskar gott 2-2 jafntefli og það varð raunin í dag. ÍBV var betra liðið á vellinum, um það verður ekki deilt, en liðið nýtti yfirburði sína ekki nægilega vel til að skilja Framara eftir. Mögulega skortur á trú og sjálfstrausti til að taka betri ákvarðanir með boltann hjá heimamönnum. Framarar komust yfir með marki sem kom gjörsamlega upp úr þurru og í kjölfarið má segja að ÍBV hafi unnið í skiptingalottóinu því varamenn þeirra náðu að gera meira en varamenn Fram. Fyrir fram voru jafntefli líklegustu úrslitin, hvorugt liðið á frábærum stað í dag og hlutirnir ekki alveg að falla með þeim.

Þrefalda skipting Framara í seinni hálfleik. Það var ekkert vesen á Fram þannig, ÍBV var ekki að skapa neitt en eftir skiptinguna þá fundu Eyjamenn betri takt og sköpuðu sér alvöru færi sem skilaði tveimur mörkum.

Fjórða 2-2 jafntefli ÍBV í röð staðreynd. Liðið vann síðast gegn Fram 8. júlí. Fram er áfram fyrir ofan ÍBV í fallbaráttunni, með fjórum mörkum betri markatölu. Ég geri ráð fyrir að bæði lið haldi með KA gegn Fylki á morgun.

Jannik Pohl og Guðmundur Magnússon fengu ekki úr miklu að moða fremst hjá Fram. Jannik fékk eitt gott skallafæri sem hann hefði átt að nýta betur. Guðmundur sást varla í leiknum. Spilamennska Fram var ekki frábær og endurspeglast kannski best á fremstu mönnum. Þeim til varnar þá fóru þeir af velli þegar Fram var yfir í leiknum en það snerist fljótlega eftir skiptingarnar. Bakverðir ÍBV áttu þá slakan dag í fyrirgjöfum sínum, þegar tækifærin komu þá voru boltarnir ekki góðir.

Fannst Pétur flottur í þessum leik, fínasta stjórn og ekkert vesen.