Það er kátt á hjalla í Breiðholtinu. Það er verið að grilla borgara í stúkunni og hoppukastalar fyrir börnin. Vel gjört!

Byrjunarliðin eru komin í hús.

Binni Gests gerir tvær breytingar á sínu liði frá sigrinum á Fram, Máni Austmann er búinn að jafna sig á veikindum og kemur inn fyrir Halldór Jón og Már Viðars er að taka út leikbann vegna uppsafnaðra gula spjalda. Inn fyrir hann kemur Stefán Þór Pálsson, Nile Walwyn er eini hreinræktaði miðvörðurinn í liði ÍR í dag, það verður fróðlegt að sjá hvernig Binni leysir það.

Kómar gerir þrjár breytingar frá stórtapinu gegn Þrótti, Ísak Atli, Aran Nganpanya og Alexander "Kexi" detta allir út fyrir þá Hauk Björns, Hauk Ásberg og Elton "Fufura" Barros. Þetta er einungis fjórði leikur Fufura í sumar og það vita allir sem fylgjast eitthvað með deildinni hvað hann getur þegar hann er heill. Því miður er það ekkert rosalega oft.

Gaman að segja frá því að Kristján Ómar Björnsson þjálfari Hauka hjálpaði ÍR að vinna 2. deildina sumarið 2016 sem leikmaður. Kómar eins og hann er oft kallaður kallar ekki allt ömmu sína og ég væri mun frekar til í að sjá hann inn á vellinum frekar en í boðvangnum. Iðnaðarleikmaður þar á ferð.

Haukarnir hafa fengið á sig flest mörk allra liða í deildinni það sem af er tímabili. Á móti hafa ÍR skorað næst fæst þrátt fyrir að vera að spila hörku bolta og koma sér í góð færi. Ég spái að stíflan bresti loksins hjá ÍR og Haukar haldi áfram að skora og fá á sig helling af mörkum og við fáum markaveislu hér í dag.

Málfríður Erna Sigurðardóttir fyrirliði Vals í Pepsi deild kvenna spáði í umferðina og hafði hún þetta að segja um leikinn:

Málfríður Erna spáir í níundu umferð Inkasso-deildarinnar

ÍR 0 - 2 Haukar (klukkan 19:15 á föstudag)
Kristján Ómar líklega búinn að vinna vel í varnarleiknum eftir skellinn gegn Þrótti í síðasta leik og Haukarnir halda hreinu í Breiðholtinu. Indriði Áki og Gunni Gunni setja sitt hvort markið.

Heimamenn í ÍR sitja í 11 sæti deildarinnar með aðeins 6 stig. Þeir gerðu góða ferð á Laugardalsvöll í síðustu umferð þar sem þeir báru sigurorð af Frömurum 2-1 og bundu á 5 leikja taphrinu.

Haukaliðið er í 7 sæti með 9 stig en hafa verið í smá brasi undanfarið og fengið á sig 8 mörk í síðustu 2 leikjum. Þeir töpuðu 5-2 gegn Þrótti á heimavelli í síðustu umferð og við vonum fyrir þeirra hönd að búið sé að vinna í vörninni á síðustu æfingum.

Komiði blessuð og sæl og verið velkominn í beina textalýsingu frá Hertz vellinum í Breiðholtinu. Í dag eigast við lið ÍR og Hauka í 9. umferð Inkasso deildar karla.