Andri Rafn Yeoman fær viðurkenningu hér fyrir leik fyrir það að vera orðin sá leikmaður sem hefur spilað flesta mótsleiki fyrir Breiðablik.

Styttist í leik og liðin að ljúka því mikilvæga verki að hita upp.

Um 10 mínútur í að leikar hefjist svo okkur gefst tími í einn kaffibolla.

Vonumst svo að sjálfsögðu eftir skemmtilegum leik.

Blikar gera eina breytingu á liði sínu frá síðasta deildarleik gegn HK en Brynjólfur Darri Willumsson fer út fyrir Alexander Helga Sigurðsson. Vekur athygli að engin Gísli Eyjólfsson er í byrjunarliði Blika

Hjá Grindavík fara þeir Sigurjón Rúnarsson og Sigurður Bjartur Hallsson út fyrir Marinó Axel Helgason og Gunnar Þorsteinsson.

Vekur athygli mína að Twitter Grindavíkur stillir Sigurjóni Rúnarssyni upp í startið svo það er spurning hvort hann hafi verið eitthvað tæpur fyrir leikinn.

Ef við skoðum svo hinn pólinn í leikjum liðanna sem engin vill sjá eða það er markalaus jafntefli hafa þau verið 4 í þessum 27 leikjum eða um 14% leikjanna.

Síðast gerðist það sumarið 2017 en þegar að þeim leik kom höfðu liðin ekki gert markalaust jafntefli í 11 ár.

Tölfræðin segir því að það verði mörk í leik kvöldsins en engu er hægt að treysta þar um.

Í gegnum tíðina hafa leikir á milli þessara félaga verið miklir markaleikir en mörk að meðaltali í þessum 27 leikjum félaganna hafa liðin skorað: Breiðablik: 1,81 mörk í leik Grindavík: 1,85 mörk í leik.

Mesta markaveislan á milli þessara félaga var í seinni leik liðanna sumarið 1995 þar sem Grindavík hafði 6-3 sigur. Grindavík endurtók svo leikinn sumarið 2008 og hafði 3-6 sigur á Kópavogsvelli. Aðeins einn leikmaður úr röðum liðanna sem tók þátt í þeim leik er á mála hjá félögunum en það er Alexander Veigar Þórarinsson leikmaður Grindavíkur.

Stærsti sigur Blika á Grindavík kom svo sumarið 1999 en það sumarið fór leikur liðanna á Kópavogsvelli 4-1 fyrir grænklæddum þar sem þá kornungur Marel Baldvinsson var á skotskónum fyrir Blika og gerði eitt mark.

Eins og tölfræðin hér að neðan gefur til kynna hefur Grindavík betur þegar kemur að leikjum liðanna í efstu deild en fyrsti leikur þeirra þar fór fram í Sjóvá Almennra deildinni árið 1995 og lauk með 0-0 jafntefli. Síðasti deildarleikur liðanna fór fram í Grindavík nú í lok apríl og lauk með sigri Breiðabliks 0-2.

Fyrri viðureignir í efstu deild

Leikir í A-deild: 27

Sigrar Breiðabliks: 9

Jafntefli : 7

Sigrar Grindavíkur: 11

Markatala : Breiðablik : 49 Grindavík : 50

Gengið hjá heimamönnum í Breiðablik hefur verið talsvert betra en hjá gestunum. Þeir sitja í 2.sæti deildarinnar 8 stigum á eftir toppliði KR en geta með sigri í kvöld minnkað bilið niður í 5 stig.

Sóknarleikur Blika hefur verið með miklum ágætum í sumar eins og 23 mörk í 12 leikjum eða tæplega 2 mörk í leik vitna um. Varnarleikurinn hefur sömuleiðis ekkert verið slæmur en þeir hafa fengið 15 mörk á sig það sem af er sumri.

Blikar væru þó eflaust til í að vera í ögn betri stöðu gagnvart KR en þeir hafa tapað 2 leikjum í röð í deildinni gegn HK og KR og hafa því misst KR talsvert frá sér í titilbaráttunni.

Gestalið Grindavíkur hefur átt í basli í sumar enda verið að smíða nýtt lið eftir brotthvarf margra lykilmanna eftir mótið í fyrra. Vörn liðsins hefur þó verið þétt og er sú besta í deildinni ef aðeins eru skoðuð mörk fengin á sig en aðeins 10 sinnum hafa andstæðingar Grindavíkur þanið netmöskvana í sumar í þeim 12 leikjum sem liðið hefur leikið.

En eins frábær og varnarleikur liðsins hefur verið þá er ekki hægt að segja það sama um sóknarleik liðsins. Aðeins 8 mörk skoruð í 12 leikjum útskýrir að mestu stöðu liðsins í 9.sæti með 13 stig og heldur sér fyrir ofan fallsætið á markatölu.

Það hjálpar þeim gulu heldur ekki að hafa ekki unnið deildarleik í rúma 2 mánuði en síðasti sigur liðsins í deildinni kom þann 20.maí síðastliðinn gegn Fylki.

Gott kvöld kæru lesendur og verið velkomin til leiks í beina textalýsingu Fótbolta.net frá leik Breiðabliks og Grindavíkur í Pepsi Max deilda karla.