Veðrið er alls ekki upp á marga fiska. Það er einfaldlega rok og rigning. Íslenskt og gott. Vorveður í boði. Mætingin er eftir því, fáir mættir í stúkuna.

Byrjunarliðin eru komin inn. Garðar Gunnlaugsson meðal þekktra nafna í byrjunarliði Kára. Hjá Leikni eru það Sævar Atli og Sólon Breki sem leiða sóknarlínuna.

Leiknir hafnaði í 3. sæti 1. deildarinnar í fyrra. Markvörðurinn og fyrirliðinn Eyjólfur Tómasson lagði hanskana á hilluna eftir tímabilið en hann er samt sem áður til taks á bekknum í kvöld fyrir hinn unga Viktor Frey Sigurðsson sem stendur í markinu.

Eyjólfur aðstoðar sína menn þar sem hollenski markvörðurinn Guy Smit sem skrifaði undir hjá Leiknismönnum í vikunni er ekki kominn til landsins.

Þá vantar einnig hinn leikna Vuk Oskar Dimitrijevic sem tekur út leikbann og Hjalti Sigurðsson, lánsmaðurinn frá KR, er á meiðslalistanum líkt og Ósvald Jarl Traustason og Birkir Björnsson.

Kári er frá Akranesi og vann KV í 1. umferð bikarsins, eftir framlengdan leik. Gunnar Einarsson, fyrrum leikmaður og þjálfari Leiknis, tók við þjálfun Kára ekki alls fyrir löngu og mætir sínu fyrrum félagi.

Í liði Kára má finna þekkt nöfn á Akranesi, nokkra reynslumikla fyrrum leikmenn ÍA. Þar á meðal er sóknarmaðurinn Garðar Gunnlaugsson sem gekk nýlega í raðir félagsins.

Sýnd veiði fyrir Leiknismenn, en alls ekki gefin.

Velkomin með okkur í Breiðholtið þar sem Leiknismenn, sem eru í Lengjudeildinni, taka á móti 2. deildarliði Kára í Mjólkurbikarnum. Það verður leikið til þrautar í kvöld og sigurliðið verður í pottinum þegar dregið verður í 32-liða úrslitin annað kvöld.