Það er sturlað veður í Fossvoginum. Örugglega ótrúlega gaman að vera áhorfandi á þessum leik. Liðin ganga út á völlinn og allt fer að verða klárt. Kalla eftir veislu í dag.

Það fara tveir aðrir leikir fram á sama tíma og þessi. Í Grafarvoginum taka Fjölnismenn á móti Breiðablik og í Árbænum mætast stigalausu liðin Fylkir og Grótta. Einum leik í þessari umferð var frestað en það var viðureign Stjörnunnar og KA. Covid smit kom uppí leikmannahópi Stjörnunnar og er megnið af leikmannahópnum í sóttkví.

Liðin mætt út á völl og byrjuð að hita upp. Júlíus Magnússon, leikmaður Víkings, átti afmæli í gær og varð 22 ára. Óskum honum innilega til hamingju með það.

Þá eru byrjunarliðin klár en þau má sjá hér til hliðar.

Heimamenn í Víking gera eina breytingu frá síðasta deildarleik þeirra gegn KA. Helgi Guðjónsson fær sér sæti á bekknum og í hans stað kemur Erlingur Agnarsson inn.

FH-ingar gera tvær breytingar frá leiknum gegn ÍA. Þeir Pétur Viðarsson og Þórir Jóhann Helgason koma inn í stað þeirra Baldurs Sigurðssonar og Guðmanns Þórissonar.

Talandi um Mjólkurbikarinn, þá var síðasta viðureign þessara liða einmit í úrslitaleik Mjólkurbikarsins 2019. Leiknum lauk með 1-0 sigri Víkinga þar sem að Óttar Magnús Karlsson skoraði sigurmarkið úr vítaspyrnu. Pétur Viðarsson, sem að nýlega tók skóna af hillunni, fékk að líta rauða spjaldið í þessum leik.

Bæði lið tryggðu sér þátttökurétt í 16-liða úrslitum Mjólkurbikarsins í vikunni. Víkingur mætti nöfnum sínum frá Ólafsvík og unnu þann leik í vítaspyrnukeppni. Helgi Guðjónsson tryggði Reykvíkingum framlengingu með marki á 90.mínútu.

FH-ingar heimsóttu Þrótt á Eimskipsvöllinn og unnu þar 2-1 sigur. Daninn geðþekki Morten Beck Guldsmed skoraði þar bæði mörk FH-inga.

Víkingur skellti sér norður til Akureyrar í síðustu umferð þar sem að þeir mættu KA í leik sem að margir vilja meina að hafi verið sá allra leiðinlegasti lengi. Steindautt 0-0 jafntefli.

Hafnfirðingar fengu ÍA í heimsókn í Kaplakrika þar sem að leiknum lauk með 2-1 sigri FH. Jónatan Ingi Jónsson og Steven Lennon skoruðu mörk FH.

Báðum liðum var spáð í Evrópubaráttu í sumar en hefja mótið missterkt. Heimamenn í Víking eru með tvö stig eftir tvær umferðir á meðan að FH-ingar eru búnir að vinna báða leiki sína og eru með sex stig.

Komiði sæl og blessuð og veriði hjartanlega velkomin á þessa beinu textalýsingu á leik Víkings og FH í þriðju umferð Pepsi Max-deildar karla. Leikurinn í kvöld fer fram á gervigrasinu á Víkingsvelli við toppaðstæður.