Liðin ganga inn á völlinn. Leiknir í hefðbundnu bláu og fjólubláu og Þórsarar í hvítum treyum og rauðum stuttbuxum.

Svona leggur Siggi Höskulds línurnar í dag! Litadeildin er í fríi en kerfi #Fotboltinet kemur til bjargar! #StoltBreiðholts pic.twitter.com/aalhOcsWDy

— Leiknir Reykjavík FC (@LeiknirRvkFC) August 15, 2020

Byrjunarliðin eru komin inn

Þrjár breytingar eru á liði Þórsara frá 3-1 tapinu gegn FH í 16-liða úrslitum Mjólkurbikarsins. Úr byrjunarliðinu fara þeir Jónas Björgvin, Alvaro og Elmar Þór. Inn koma Jakob Snær, Fannar Daði og Jóhann Helgi. Fljótt á litið sýnist mér þetta vera uppstillingin 4-2-3-1 með Orra og Sigga á miðjunni og Jóhann fremstan. Ólafur Aron er ekki í leikmannahópi Þórsara.

Leiknismenn gera tvær breytingar á sínu liði. Úr byrjunarliðinu fara þeir Daníel Finns, sem er ekki í hóp, og Hjalti Sigurðsson. Inn koma þeir Bjarki Aðalsteinsson og Árni Elvar.

Þórsarar hafa verið án Ólafs Arons Péturssonar í undanförnum leikjum og spurning hvort hann verði klár í dag. Jóhann Helgi Hannesson sneri til baka gegn FH í síðasta leik eftir höfuðhögg og gæti hann leitt línu gestanna í dag. Þá hafa þeir Orri Sigurjónsson og Fannar Daði Malmquist verið að glíma við meiðsli en Orri hefur spilað undanfarna leiki.

Leiknismenn hafa verið án Ósvalds Jarls Traustasonar og Brynjars Hlöðverssonar.

Engir áhorfendur (ef frá eru taldir að hámarki tíu útvaldir hjá hvoru félagi) verða leyfilegir í stúkunni í dag. Því reyni ég að gera leiknum sem best skil og samkvæmt mínum upplýsingum verður leikurinn í beinni vefútsendingu og mun ég koma með upplýsingar um hvernig megi nálgast streymið þegar þær berast.

Þórsarar sigruðu þessa í viðureign á síðasta tímabili, 0-3. Báðir markaskorararnir verða ekki með í dag þar sem Ármann Pétur Ævarsson hefur lagt skóna á hilluna og Alvaro tekur út leikbann.

Leiknismenn hafa tapað fimm stigum í sumar og hafa þau öll tapast á heimavelli. Liðið tapaði gegn ÍBV og gerði jafntefli gegn Vestra. Þórsarar hafa unnið tvo leiki á útivelli (gegn Þrótti R. og Leikni F.) og tapað tveimur leikjum.

Máni ekki til Bandaríkjanna
Þórsarar hafa skorað þrettán mörk og fengið þrettán á sig í fyrstu átta umferðunum. Leiknir hefur skorað 22 mörk og fengið ellefu á sig.

Alvaro hefur skorað fimm mörk hjá Þór og þeir Vuk Oskar Dimitrijevic og Sólon Breki Leifsson hafa einnig skorað fimm mörk. Sævar Atli Magnússon og Máni Austmann Hilmarsson hafa þá skorað þrjú mörk fyrir Breiðhyltinga. Máni virtist á leið til Bandaríkjanna í áframhaldandi nám en þau plön hafa breyst, Máni verður áfram á Íslandi.

Í fjarveru Alvaro eru markahæstu leikmenn Þórsara í deildinni þeir Izaro Abella Sanchez, Jóhann Helgi Hannesson og Bjarki Þór Viðarsson með tvö mörk hver.

Þórsarar, sem eru í 5. sæti Lengjudeildarinnar (sex stigum á eftir toppliðunum), hafa unnið einn sigur í síðustu sex leikjum í öllum keppnum á meðan Leiknir hefur unnið síðustu fjóra leiki. Í síðasta deildarleik steinlágu Þórsarar gegn Fram í Safamýri, 6-1, eftir að hafa komist yfir í leiknum. Í þeim leik fékk Alvaro Montejo, markahæsti leikmaður Þórsara, rauða spjaldið og tekur út leikbann í dag.

Leiknir sigraði Aftureldingu, 2-3, á útivelli í síðustu umferð. Leiknir komst í 0-3 en Afturelding náði að minnka muninn og seinna mark heimamanna kom á 93. mínútu.

Síðustu leikir liðanna fóru fram þann 26. og 27. júlí og því hafa liðin ekki spilað í tæpar þrjár vikur þar sem boltanum var slegið á frest vegna Covid.

Jú komiði sælir lesendur góðir og veriði velkomnir í beina textalýsingu frá eina leiknum sem skiptir máli þennan laugardaginn, Leiknir R. tekur á móti Þór á Domusnova vellinum. Endurkoma fótboltans, takk fyrir. Leikurinn hefst klukkan 16:00.

Topplið Leiknis mætir Þór í slag sem getur komið Þór að alvöru upp í toppbaráttuna en á sama tíma komið Leikni þremur stigum frá ÍBV sem spáð var öruggum sigri í deildinni. Leikurinn er liður í 9. umferð deildarinnar.