Nú er þetta að hefjast! Liðin koma úr sitthvorri áttinni inn á völlinn og allir halda góðu bili. Góðir tveir metrar og allt í toppstandi í Kópavoginum.

Liðin ganga nú til búningsklefa og klára lokaundirbúning fyrir leik. Vonandi fáum við skemmtilegan leik.
Vallarþulurinn er nú að lesa upp byrjunarliðin og bjóða öllum núll áhorfendum leiksins velkomna á völlinn.

Hálftími í leik og byrjunarliðin eru komin!
Steini (þjálfari Blika) gerir eina breytingu á sínu liði frá síðasta leik sem var 0:7 sigur á botnliði FH. Rakel Hönnudóttir kemur inn fyrir Hildi Þóru.

Þá gerir Andri (þjálfari Þór/KA) þrjár breytingar á sínu liði frá jafnteflinu við Stjörnuna í síðasta leik. Berglind, Saga og Snædís koma inn fyrir Kareni, Margréti og Huldu Ósk.

Í fyrra unnu Blikar fyrri leikinn 1:4 þar sem Hildur Antons, Agla María, Berglind Björg og Áslaug Munda skoruðu mörk þeirra grænklæddu en Borgarstjórinn skoraði eina mark Þór/KA.
Seinni leikurinn endaði svo með jafntefli eins og kom fram áðan.

Þór/KA situr í 5. sæti deildarinnar með 11 stig og hafa unnið 3 leiki í sumar, tapað 3 og gert 2 jafntefli.
Þór/KA byrjuðu mótið með stæl og unnu 2 stórsigra gegn Stjörnunni og ÍBV en var svo skellt hressilega niður á jörðina í leik gegn Val þar sem þær töpuðu 6:0. Eftir það hefur gengið verið svona upp og ofan.

Byrjum aðeins á að ræða gengi Blika í sumar.
Þær eru með fullt hús stiga eftir 8 leiki og markatöluna 35:0. Já þið lásuð rétt, Blikastelpur hafa ekki bara unnið alla sína leiki heldur hafa þær ekki enn fengið á sig mark í sumar!
Blikar eru því ansi líklegar til sigurs hér í kvöld en við skulum ekki gleyma því að í fyrra þá var Þór/KA eina liðið sem tók stig af Breiðabliki fyrir utan Val.

Góðan og blessaðan daginn kæru lesendur og verið hjartanlega velkomin í beina textalýsingu frá leik Breiðabliks og Þór/KA í 9. umferð Pepsi-Max deildar kvenna.