Vegna sóttvarnarreglna verða áhorfendur að vera í merktum sætum í stúkunni. Því fær enginn að vera í grasbrekkunni og því hafa skagamenn brugðið á það ráð að koma þar fyrir 17 varnarmönnum í vestum.

Halldór Smári Sigurðsson sem er kominn á bekkinn hjá Víkingum samkvæmt skýrslu í dag er greinilega ekki leikfær. Hann fylgist með upphitun hér á vellinum í strigaskóm.

Tvær breytingar eru á liði ÍA frá því sem mætti Val í fyrstu umferð. Steinar Þorsteinsson og Aron Kristófer Lárusson koma inn. Hákon Ingi Jónsson er á bekknum og Ísak Snær tekur sem fyrr segir út leikbann.

Tvær breytingar eru á liði Víkings sem mætti Keflavík í fyrstu umferð. Helgi Guðjónsson og Kári Árnason koma inn fyrir þá Halldór Smára Sigurðsson og Halldór Jón Sigurð Þórðarson sem fara á bekknum.

Liðin mættust tvisvar í Pepsi Max-deildinni á síðasta ári en í fyrri leiknum höfðu Víkingar mikla yfirburði á sínum heimavelli 19. júlí og unnu 6 - 2.

Liðin mættust svo aftur 27. september á Akranesi og þá lauk leiknum með 2 - 2 jafntefli. Tryggvi Hrafn Haraldsson skoraði bæði mörk ÍA en hann er í Val í dag. Mörk Víkings skoruðu Ágúst Eðvald Hlynsson sem er í FH og Halldór Jón Sigurður Þórðarson sem verður líklega í hóp Víkinga í dag.

Lögregluvarðstjórinn Pétur Guðmundsson dæmir leikinn á Akranesi í dag en hann hafði dæmt markalausan leik HK og KA í fyrstu umferðinni þar sem hann lyfti fjórum gulum spjöldum í fyrri hálfleik.

Honum til aðstoðar á línunum verða þeir Þórður Arnar Árnason og Ragnar Þór Bender. Elías Ingi Árnason er skiltadómari og KSÍ sendir Þórarinn Dúa Gunnarsson sem eftirlitsmann til að fylgjast með framkvæmd leiksins og dómurunum.

Pétur hafði í nægu að snúast í fyrstu umferðinni.

Það er spurning hvort Arnar Gunnlaugsson þjálfari Víkinga muni gefa Helga Guðjónssyni tækifæri í byrjunarliðinu. Helgi var frábær í vetur en óvænt á bekknum gegn Keflavík í 1. umferð. Arnar bað hann afsökunar á því.

,,Þetta voru vonbrigði fyrir hann og ég bað hann afsökunar á þessu. Það var hrikalega erfitt að skilja hann eftir á bekknum, hann átti það svo sannarlega ekki skilið," sagði Arnar við Fótbolta.net.

Helgi Guðjónsson í leiknum gegn Keflavík í fyrstu umferð.

Mótið er rétt að byrja og 1-3 sigur KA á KR í gær var fyrsti leikur 2. umferðar. Svona er staðan fyrir leiki kvöldsins.

1. KA 4 stig (+2)
2. FH 3 stig (+2)
3. Valur 3 stig (+2)
4. KR 3 stig (0)
5. Víkingur R 3 stig (+1)
6. HK 1 stig (0)
7.Leiknir R 1 stig (0)
8. Stjarnan 1 stig (0)
9. Keflavík 0 stig (-1)
10. Breiðablik 0 stig (-2)
11. Fylkir 0 stig (-2)
12. ÍA 0 stig (-2)

Ísak Snær Þorvaldsson verður ekki með ÍA í dag en hann tekur út leikbann. Hann fékk sitt annað gula spjald og þar með rautt fyrir þessa tæklingu á Hauk Pál Sigurðsson í opnunarleiknum gegn Val.

Ísak tæklar Hauk Pál Sigurðsson í síðustu umferð.

Í fyrstu umferðinni fóru Skagamenn á Hlíðarenda og töpuðu þar 2 - 0 gegn Íslandsmeisturum Vals.

Víkingar spiluðu heimaleik gegn Keflavík og unnu leikinn 1 - 0 með marki Sölva Geir Ottesen.

Gott kvöld og verið velkomin í beina textalýsingu frá viðureign ÍA og Víkings Reykjavík.

Leikurinn er liður í 2. umferð Pepsi Max-deildar karla og hefst klukkan 19:15 á Akranesvelli.