Byrjunarliðin eru klár og má sjá hér til hliðar eða með því að smella hér fyrir byrjunarliðsfréttina.

HK gerir eina breytingu á liði sínu frá síðasta leik gegn Íslandsmeisturum Vals en inn kemur Örvar Eggertsson fyrir Ívar Örn Jónsson.
FH gerir þá einnig eina breytingu á liði sínu frá því þeir mættu ÍA í síðasta leik en Hjörtur Logi Valgarðsson kemur inn fyrir Pétur Viðarsson.

Dómari leiksins er Elías Ingi Árnason og honum til aðstoðar verða þeir Þórður Arnar Árnason og Smári Stefánsson. Gunnþór Steinar Jónsson verður á skiltinu og til taks ef eitthvað kemur uppá og þá er Viðar Helgason eftirlitsdómari.

Kjartan Atli Kjartansson er þáttarstjórnandi í Pepsi Max stúkunni á Stöð 2 Sport. Hann er spámaður fyrir 4. umferð deildarinnar.

HK 3 - 4 FH
HK-liðið er til alls líklegt og á sínum degi er það eitt skemmtilegasta lið deildarinnar. FH-ingar eru að finna taktinn hægt og rólega. Þrátt fyrir góða uppskeru er kemur að stigum held ég að liðið eigi enn nokkra gíra eftir til að komast á fullt. Ég held að FH nái í sigur í þessum leik og tippa á að lokatölur verði 3-4. Verðum við ekki að tippa á einn alvöru markaleik? Steven Lennon átti góðan leik í Kórnum á síðustu leiktíð, honum líður vel innandara. Reyndar utandyra líka, ef út í það er farið. Hann setur allavega tvö.

Við skulum renna stuttlega yfir helstu þætti fyrir þessa umferð hjá þessum liðum.

HK

Sæti: 8
Leikir: 3
Sigrar: 0
Jafntefli: 2 (67%)
Tap: 1 (33%)

Markahæstir:
Stefan Alexander Ljubicic - 2 mörk
Ásgeir Marteinsson - 1 mark
Jón Arnar Barðdal - 1 mark


FH

Sæti: 1
Leikir: 3
Sigrar: 2 (67%)
Jafntefli: 1 (33%)
Tap: 0

Markahæstir:
Ágúst Eðvald Hlynsson - 2 mörk
Steven Lennon - 2 mörk
Matthías Vilhjálmsson - 2 mörk
Vuk Oskar Dimitrijevic - 1 mark

FH sigraði báðar viðreignir þessara liða á síðasta tímabili.

Leikurinn í Kórnum fór HK 2-3. Mörk HK skoruðu Valgeir Valgeirsson og Ásgeir Marteinsson en fyrir FH skoraði Steven Lennon 2 og þá varð Leifur Andri Leifsson fyrirliði HK fyrir því óláni að skora sjálfsmark.

FH sigraði svo örugglega á Kaplakrika 4-0 þar sem Steven Lennon skoraði þrennu og Þórir Jóhann eitt.

Það er því nokkuð ljóst að Steven Lennon kann vel við sig gegn HK og spurning hvað hann gerir í kvöld.

FH tóku á móti ÍA í síðustu umferð í Kaplakrika.
Leikurinn byrjaði ekki vel fyrir fimleikafélagið en þeir lentu undir strax á 7.mín en í 3. leiknum í röð missir mótherji þeirra mann af velli með rautt í fyrri hálfleik og eftir það var ekki aftur snúið og fór fimleikafélagið með sannfærandi 5-1 sigur.

HK heimsóttu Íslandsmeistara Vals í síðustu umferð og voru grátlega nálægt því að yfirgefa Hlíðarenda með stig í pokanum en Almarr Ormarsson stal sigrinum fyrir Valsmenn í uppbótartíma og fór svo að leiknum lauk með 3-2 sigri Valsmanna.
HK spilaði virkilega vel í þeim leik og mega vera svekktir með fenginn hlut úr þeirri rimmu.

Eftir 3 umferðir af Pepsi Max lítur þetta svona út á stigatöflunni:

1.FH 7 stig (+6)
2.KA 7 stig (+5)
3.Valur 7 stig (+3)
4.Víkingur R 7 stig (+2)
5.Breiðablik 4 stig (+2)
6.KR 4 stig (0)
7.Keflavík 3 stig (-3)
8.HK 2 stig (-1)
9.Fylkir 2 stig (-2)
10.Leiknir R 2 stig (-3)
11.Stjarnan 1 stig (-3)
12.ÍA 1 stig (-6)

Pepsi Max deildin hefur byrjað frábærlega og eru öll lið deildarinnar komin á blað og búin að sækja sér a.m.k. stig. Þá hefur ekkert lið fullt hús.

Heil og sæl lesendur góðir og verið hjartanlega velkominn í þessa þráðbeinu textalýsingu beint frá Kórnum þar sem 4.umferð Pepsi Max deild karla heldur áfram.