Jæja allt að verða klárt í Poznan, liðin ganga út á völlinn. Þriðja leikinn í röð sem Hjörtur Hermannsson og Brynjar Ingi Bjarnason mynda miðvarðapar Íslands. Alvöru verkefni sem þeir fá gegn Lewandowski og vinum hans.

Portúgalinn Paulo Sousa heldur um stjórnartaumana hjá pólska liðinu. Var verulega frambærilegur leikmaður á sínum tíma og lék yfir 50 landsleiki fyrir Portúgal ásamt því að vinna Meistaradeildina bæði með Juventus og Dortmund. Sousa tók við pólska liðinu í byrjun þessa árs.

Markahrókurinn Robert Lewandowski hjá Bayern München, ein besta nía heims, er með fyrirliðabandið hjá Pólverjum. Þá þarf Ísland að reyna að halda Piotr Zielinski, leikmanni Napoli, niðri en hann hefur mikinn sköpunarmátt.

Fótbolti.net birti líklegt byrjunarlið í gær en frá því liði voru Ísak Bergmann og Jón Dagur inni, þeir byrja hinsvegar á bekknum. Andri Fannar Baldursson og Jón Daði Böðvarsson byrja leikinn gegn Pólverjum.

Svona er byrjunarlið Íslands:

Áhorfendur á vellinum
Ísland og Pólland hafa mæst sex sinnum í A landsliðum karla. Fimm sinnum hafa Pólverjar fagnað sigri, en einu sinni var niðurstaðan jafntefli og var það í vináttuleik á Laugardalsvelli árið 2001. Andri Sigþórsson skoraði mark íslenska liðsins seint í leiknum. Arnar Þór Viðarsson sem er nú við stjórnvölinn hjá íslenska landsliðinu spilaði þann leik.

Sem fyrr segir mætast liðin nú í Poznan, á heimavelli Lech Poznan, sem tekur tæplega 42 þúsund áhorfendur í sæti, en leyfilegur hámarksfjöldi að þessu sinni er helmingur af sætafjöldanum. Leikvangurinn var vígður árið 1980 og endurbættur árið 2010. Leikurinn er síðasti leikur pólska liðsins áður en það hefur þátttöku í lokakeppni EM og er búist við mikilli stemmningu á leikvanginum, sem hefur einnig hýst risatónleika listamanna á borð við Sting, Aliciu Keys og hina síungu rokkara í Iron Maiden.

"Við ætlum ekki að koma í þennan leik sem æfingafélagar". Eiður Smári Guðjohnsen aðstoðarþjálfari A landsliðs karla í viðtali fyrir vináttuleikinn við Pólland. Leikurinn hefst kl. 16:00 að íslenskum tíma og er í beinni á RÚV. pic.twitter.com/yFwHIcboFb

— Knattspyrnusambandið (@footballiceland) June 8, 2021

Í dag klukkan 16:00 mætast Pólland og Ísland í vináttulandsleik á heimavelli Lech Poznan.



Samkvæmt pólskum fjölmiðlamönnum má búast við því að Pólland tefli fram sínu sterkasta en liðið er að búa sig undir EM alls staðar þar sem liðið er í E-riðli með Spáni, Svíþjóð og Slóvakíu.

Fróðlegt verður að sjá hvernig okkar mönnum gengur að verjast Robert Lewandowski, einum besta sóknarmanni heims, sem hefur raðað inn mörkum fyrir Bayern München og Pólland undanfarin ár.



Hér að neðan má sjá líklegt byrjunarlið Íslands en frá sigrinum gegn Færeyjum er Kolbeinn Sigþórsson búinn að yfirgefa hópinn. Líklegt er að Albert Guðmundsson komi inn í byrjunarliðið í hans stað og þá giskum við á að Mikael Anderson byrji eftir sigurmarkið í Þórshöfn.

Guðmundur Þórarinsson gæti fengið tækifærið í vinstri bakverðinum og Brynjar Ingi Bjarnason, leikmaður KA, byrjar væntanlega sinn þriðja A-landsleik í röð.



Dómari leiksins er frá Ungverjalandi og heitir Balazs Berke.



Þetta er þriðji og síðasti landsleikur Íslands í þessum glugga. Fyrst kom naumt tap gegn Mexíkó, svo ansi tæpur sigur gegn Færeyjum.

"Ég er rosalega ánægður með ferðina hingað til. Ég er mjög ánægður með þá ákvörðun að fara út í þetta Dallas ævintýri. Það gaf okkur mjög mikið. Við erum á degi tíu og við erum búnir að geta farið í gegnum sóknar- og varnartaktík ansi oft. Við erum komnir á þann stað í ferðinni að við getum farið að einbeita okkur að einstaklingsbundnum samtölum. Við getum sýnt þeim einn á einn hvað mætti betur fara og hvar þeirra styrkleikar liggja. Þessi gluggi og þessir þrír leikir munu verða til þess að það munu leikmenn - sem eru núna með okkur - sem eru ekki bara byrjaðir að banka dyrnar, þeir eru búnir að opna hurðina. Það er þeirra að stíga inn," segir Arnar Þór Viðarsson landsliðsþjálfari.



Íslenski hópurinn:

Markmenn:
Elías Rafn Ólafsson - Fredericia
Rúnar Alex Rúnarsson - Arsenal
Ögmundur Kristinsson - Olympiacos

Varnarmenn:
Alfons Sampsted - Bodö Glimt
Brynjar Ingi Bjarnason - KA
Guðmundur Þórarinsson - New York City FC
Hjörtur Hermannsson - Bröndby IF
Ísak Óli Ólafsson - Keflavík
Kolbeinn Þórðarson - Lommel SK
Valgeir Lunddal Friðriksson - Häcken

Miðjumenn:
Andri Fannar Baldursson - Bologna
Aron Einar Gunnarsson - Al Arabi
Aron Elís Þrándarson - OB
Birkir Bjarnason - Brescia
Gísli Eyjólfsson - Breiðablik
Ísak Bergmann Jóhannesson - IFK Norrköping
Jón Dagur Þorsteinsson - AGF
Mikael Neville Anderson - FC Midtjylland
Stefán Teitur Þórðarson - Silkeborg IF

Sóknarmenn:
Albert Guðmundsson - AZ Alkmaar
Jón Daði Böðvarsson - Millwall
Sveinn Aron Guðjohnsen - OB