Oliver byrjar leikinn.

Það er baulað þegar grænklæddir Blikar ganga út á völlinn.

Það er vel mætt á völlinn í Aberdeen. Stuðningsmenn skoska liðsins í góðum gír.

Er að fá tíðindi um mögulega breytingu á byrjunarliði Blika. Oliver Sigurjónsson kveinkar sér í upphitun og kemur Alexander Helgi væntanlega inn í byrjunarliðið fyrir hann.

Núna þurfa Blikarnir að hlusta vel á Óskar og vinna þennan leik bara.

Óskar Hrafn skaut á Aberdeen
Þjálfari Blika skaut á skoska liðið og þeirra leikstíl eftir tapið á Laugardalsvelli.

'Ef að frá eru skildar fyrstu sex mínúturnar, þá fannst mér við mikið betri allan leikinn. Við erum að fara til Aberdeen, ætlum að vinna með tveimur og slá þessa gæja út,' sagði Óskar í samtali við Stöð 2 Sport eftir leikinn.

'Þeir gera enga tilraun til að spila fótbolta, eyddu meiri tíma í að tefja en að senda hann á milli. Við eigum að vinna þetta lið, þannig met ég þetta.'

Kom Aberdeen eitthvað á óvart? 'Ég bjóst ekki við því að þeir væru svona lélegir. Ég hélt þeir myndu reyna að spila fótbolta. Þeir gerðu enga tilraun til þess og það kom mér á óvart. Þeir eru líkamlega sterkir, fljótir og öflugir í loftinu.'

Fyrri leikurinn
Fyrri leikurinn endaði með 3-2 sigri Aberdeen.

Úr úrslitafrétt:
Breiðablik þurfti að sætta sig við svekkjandi tap gegn Aberdeen frá Skotlandi í fyrri leiðanna í 3. umferð forkeppni Sambansdeildar UEFA á Laugardalsvelli í kvöld.

Blikar voru ekki alveg á tánum í föstum leikatriðum til að byrja með. 'Hornspyrnan er tekin meðfram jörðinni og Ramirez kemur í hlaup á nærstöngina og þrumar boltanum í nærhornið framhjá Antoni Ara. Vel útfært hjá Skotunum en Blikar ekki tilbúnir!' skrifaði Sæbjörn Þór Steinke í beinni textalýsingu eftir aðeins þriggja mínútna leik.

Átta mínútum síðar komst Aberdeen í 2-0 og aftur kom markið eftir fast leikatriði.



Blikar létu þessa skelfilegu byrjun ekki slá sig út af laginu. Gísli Eyjólfsson minnkaði muninn á 16. mínútu og rétt fyrir leikhlé jafnaði Árni Vilhjálmsson úr vítaspyrnu. Árni var mjög öflugur í fyrri hálfleik.



Breiðablik byrjaði seinni hálfleikinn hins vegar líka illa og Aberdeen tók forystuna aftur þegar örfáar mínútur voru liðnar frá upphafsflauti. Ramirez var aftur á ferðinni fyrir skoska liðið.

Aberdeen gerði ekki mikið eftir það. Seinni hálfleikurinn var frekar rólegur heilt yfir og fleiri mörk ekki skoruð. Aberdeen hægði mjög á leiknum undir lokin og Breiðablik náði ekki að koma tempóinu upp, eins og í fyrri hálfleik.

Sigurður Heiðar Höskuldssson, þjálfari ársins í Pepsi Max-deildinni til þessa, var á meðal þeirra sem spáði í leikinn fyrir okkur.

Ég hef það mikla trú á þessu Breiðabliks-projecti og er það bjartsýnn maður að eðlisfari að ég er alltaf að fara að spá Blikunum áfram. Óskar hefur líklega náð að kynda vel í Aberdeen með þessu viðtali eftir fyrri leikinn og það mun setja þá aðeins úr jafnvægi; 1-3 lokatölur. Árni Vill með tvö, Aberdeen minnkar í 1-2 og dæla nokkrum háum inn á teig í kjölfarið. Gísli Eyjólfs skorar hins vegar sigurmarkið úr skyndisókn í lokin.

Já, við vonum það!

Ég fékk nokkra álitsgjafa til að spá í þennan leik og þeir voru flestir bjartsýnir. Smelltu hér til að skoða fréttina.

BYRJUNARLIÐ ABERDEEN
Declan Gallagher, Ryan Hedges og Dylan McGeouch koma inn í byrjunarlið Aberdeen fyrir Jay Emmanuel-Thomas, Funso Ojo og Johnny Hayes.

Fyrirliðinn Scott Brown er auðvitað á sínum stað í byrjunarliðinu!

BYRJUNARLIÐ BLIKA
Óskar Hrafn Þorvaldsson gerir tvær breytingar frá fyrri leiknum, sem endaði með 3-2 tapi. Inn í liðið koma Jason Daði Svanþórsson og Davíð Örn Atlason fyrir Alexander Helga Sigurðarson og Kristin Steindórsson.

Því miður erum við ekki í Skotlandi á þessum leik. Þess í stað tökum við textalýsinguna í gegnum Stöð 2 Sport.

Góðan og gleðilegan daginn kæru lesendur.

Hér verður bein textalýsing frá leik Breiðabliks við Aberdeen í Skotlandi. Þetta er seinni leikur liðanna í 3. umferð forkeppni Sambandsdeildarinnar.