SKÝRSLAN: Níu Blikafingur á bikarnum
Hvað réði úrslitum?
Blikar mættu grimmari til leiks og voru einfaldlega betri aðilinn. Stjörnustúlkur litu ekki vel út í kvöld. Var það ferðaþreyta, taugaveiklun, eða bara gæðamunur á liðunum? Erfitt að segja, en frá fyrstu mínútu voru gestirnir allavega líklegri til sigurs og tóku stigin þrjú sanngjarnt. Þær ætla sér að taka þennan titil og eru á góðri leið með það.
Bestu leikmenn
1. Fanndís Friðriksdóttir
Fanndís var stórhættuleg fram á við, sérstaklega í fyrri hálfleik. Var dugleg að taka góð hlaup og kom með góðar sendingar. Skoraði í þokkabót stórglæsilegt sigurmark Breiðabliks.
2. Andrea Rán Snæfeld Hauksdóttir
Magnaður leikur á miðjunni hjá Andreu. Hún vann eins og vél, tók hverja tæklinguna á fætur annarri og var dugleg að skila boltanum til samherja. Óhætt að segja að hún hafi lagt sig 120% fram í kvöld.
Atvikið
Stórglæsilegt sigurmark Fanndísar. Þetta byrjaði allt með innkasti, Fjolla Shala fékk boltann og lagði á Fanndísi sem var fyrir utan teiginn. Fanndís fór illa með varnarmann og lúðraði boltanum í fjærhornið, gjörsamlega óverjandi. Ekki slæmt að vinna erkifjendurna á svona marki.
Hvað þýða úrslitin?
Blikar eru svo gott sem orðnir meistarar. Þær eru með sjö stiga forskot á Stjörnuna á toppi deildarinnar þegar fjórar umferðir eru eftir. Það er ekki séns að þær séu að fara að missa þetta frá sér. Liðið hefur haldið hreinu í 11 leikjum í röð og það virðist enginn geta stöðvað þær.
Vondur dagur
Brasilíska tvíeykið hjá Stjörnunni gerði alls ekki það sem var ætlast til af þeim. Francielle gaf varla á samherja og lítið kom úr Poliönu sömuleiðis. Þessar landsliðskonur voru fengnar til að styrkja liðið til muna, bæði í titilbaráttunni og í Evrópukeppni, en þær gerðu afar lítið til að hjálpa liðinu í dag.
Dómarinn - 8,5
Guðmundur Ársæll var mjög flottur í kvöld og gerði varla mistök. Hann náði að koma í veg fyrir að leikurinn færi í einhverja vitleysu en lét hann samt fljóta vel. Flott frammistaða hjá fasteignasalanum.