Góðan og margblessaðan daginn. Hér er bein textalýsing frá viðureign FH og Þórs í 16. umferð Pepsi-deildar karla. Þorvaldur Árnason dómari flautar til leiks klukkan 17 en aðstoðarmenn hans í dag eru Óli Njáll Ingólfsson og Smári Stefánsson. FH-ingar þurfa á öllum stigunum að halda til að eiga enn von um Íslandsmeistaratitilinn en Þórsarar sitja í áttunda sæti og hafa fjarlægst falldrauginn vel og innilega.

Fáir veðja á Þórsara í dag enda stór skörð í þeirra liði. Janez Vrenko tekur út leikbann, Atli Sigurjónsson er staddur í Hollandi þar sem hann er við æfingar hjá úrvalsdeildarliðinu NEC, Alexandar Linta er staddur erlendis og Gunnar Már Guðmundsson má ekki spila leikinn vegna ákvæða í lánssamningi. Þá er Páll Viðar Gíslason þjálfari staddur með Atla í Hollandi og Hreinn Hringsson aðstoðarþjálfari stýrir því liðinu í dag.

Leikmenn Þórs eru búnir að taka sér göngutúr um völlinn á meðan vallarstarfsmenn leggja lokahönd á að gera allt klárt. Byrjunarliðin má sjá til hliðar. Minnum fólk sem skrifar færslur varðandi leikinn að nota hashtagið #fótbolti en valdar færslur rata hingað í textalýsinguna

Glöggir lesendur hafa séð að Gunnar Kristjánsson er mættur aftur í leikmannahóp FH en hann hefur ekki spilað síðan hann meiddist gegn Stjörnunni í lok maí. Gunnar er á bekknum í dag.

Liðin eru mætt inn á völlinn og eru í þessum skrifuðu orðum að heilsast.

Leikurinn er hafinn. Þórsarar sækja í átt að Reykjavík en FH í átt að KFC í Hafnarfirði.

FH-ingar eru hættulegri hér í byrjun leiks. Matthías Vilhjálmsson var að fá fínasta færi en skot hans hafnaði í varnarmanni og fór svo aftur fyrir í hornspyrnu. Ekkert varð úr horninu.

FH mun meira með boltann en liðinu gengur brösuglega að finna glufur á vörn Þórsara og fátt markvert átt sér stað í leiknum.

Við heyrðum að Páll Viðar þjálfari Þórs væri hress í Hollandi að skoða þessa textalýsingu. Viljum við því skila kveðju til hans og Atla Sigurjónssonar.

Freyr skallar yfir mark Þórs eftir hornspyrnu. Annars lítið sem ekkert að frétta í þessum leik.

Þórsarar komu boltanum fram á David Disztl sem var heldur einmana og fékk enga hjálp frá samherjum sínum en FH-ingar náðu þó ekki af honum boltanum. Á endanum fékk Disztl svo hjálpina og úr varð hættulegasta sókn Þórs í leiknum þó hún hafi ekki endað með skoti að marki.

Björn Daníel með góða rispu og renndi boltanum á Matthías fyrirliða sem var í fínni skotstöðu rétt fyrir utan teiginn. Skot Matthíasar var ekki nægilega öflugt og Rajkovic í marki Þórs átti ekki í vandræðum með að verja.

FH-ingar aðeins að ná að opna Þórsvörnina núna og Atli Guðnason fékk fínt færi en skotið beint á Rajkovic. Baldvin Ólafsson átti svo skot af löngu færi hinumegin en Gunnleifur varði auðveldlega.

Hólmar Örn Rúnarsson í dauðafæri! Klippti boltann yfir af markteignum eftir fyrirgjöf frá Matthíasi.

Hálfleikur. Það er markalaust. FH-ingar náðu aðeins að ógna marki Þórs meira undir lok hálfleiksins. Ég bjóst við markaleik en svo virðist ekki ætla að vera.

FH-lögin óma í hálfleiknum eins og venja er. Boltasækjarnir fá að leika sér á vellinum í hálfleik og sýna nokkrir ansi fín tilþrif. Greinilega efnilegir fótboltamenn á ferðinni.

Seinni hálfleikur hafinn. Vonandi verður hann mun skemmtilegri en sá fyrri.

Leikurinn fer algjörlega fram á vallarhelmingi Þórsara þessa stundina. FH átt nokkrar álitlegar sóknir og mark frá liðinu virðist liggja í loftinu.

Jafnræði með liðunum eftir rauða spjaldið. Lítið um opin marktækifæri.

Þarna var Matthías Vilhjálmsson í hörkufæri en frábær markvarsla hjá Srdjan Rajkovic sem sýndi snör viðbrögð og varði meistaralega í horn.

FH-ingar eru líklegri þrátt fyrir að vera einum færri.

Stórhættuleg sókn FH. Atli Guðnason fékk nægt pláss til að athafna sig utarlega í teignum og renndi svo knettinum á Atla Viðar sem náði ekki nægilega góðu skoti, Rajkovic varði. Örskömmu síðar fékk Matthías Vilhjálmsson fínt færi en gestirnir björguðu í horn á síðustu stundu. Tíu heimamenn líklegir hérna í lokin.

Leik lokið með 2-0 sigri FH. Gríðarlega mikilvæg þrjú stig hjá FH sem hefur unnið fimm leiki í röð og heldur sér í titilbaráttunni.