Valsmenn stjórnuðu leiknum frá A-Ö og sigur þeirra var síst of stór miðað við síðari hálfleikinn. Skagamenn vörðust vel í fyrri hálfleik en um leið og fyrsta markið kom var ekki spurning hvoru megin sigurinn myndi enda. Valsmenn léku á als oddi í síðari hálfleik og hefðu auðveldlega getað skorað mörk. Mörkin dreifðust á milli manna. Tveir varnarmenn skoruðu og Kristinn Ingi skoraði loksins sitt fyrsta mark í sumar.

Sjötta mark Vals gladdi stuðningsmenn liðsins eflaust mest! Kristinn Ingi Halldórsson skoraði loksins sitt fyrsta mark í sumar eftir að hafa fengið fjölmörg færi. Óli Jó lofaði því eftir leik að mörkin komi á færibandi eftir þetta.

Valsmenn eru með átta stiga forskot á toppnum en FH getur minnkað bilið í sjö stig með sigri á KA á laugardag. Skagamenn eru á botninum með níu stig, fjórum stigum frá öruggu sæti. Svört staða á Skaganum.

Margir leikmenn ÍA gera tilkall hér. Varnarleikur Skagamanna í heild sinni var hörmulegur í síðari hálfleiknum og augljós uppgjöf í gangi. Ingvar Þór Kale hefði átt að gera betur í fyrsta markinu og hann átti einnig misheppnaða spyrnu fram völlinn í aðdragandanum á marki númer tvö. Þessi mörk komu Valsmönnum á bragðið og Ingvar er væntanlega ekki sáttur með sinn þátt í þeim.

Hafði fín tök á leiknum. Hefði þó mögulega getað sent Þórð út af þegar hann traðkaði á Patrick eftir að búið var að flauta aukaspyrnu.