Sæl og velkomin í beina textalýsingu frá leik Selfoss og Grindavíkur sem hefst klukkan 19:15 hér á Selfossvelli. Það er aðeins vindur á Selfossi en þurrt og ágætar aðstæður til að spila fótbolta.

Byrjunarliðin eru klár, fljótt álitið er óbreytt lið hjá heimamönnum en gestirnir gera þrjár breytingar frá tapi gegn Stjörnunni. Scott Ramsey, Pape Faye og Óli Baldur fara á bekkinn og inn koma Alexander Magnússon sem var í banni, Matthías Örn og Alex Freyr.

Hvetjum notendur samskiptamiðilsins twitter endilega til að nota hashtag-ið #fotbolti þegar þið tístið um leikinn og reyndið endilega að hafa léttleikann í fyrirrúmi. Aldrei að vita nema valin tíst fljóti með hér í umfjölluninni.

Síðast þegar þessi lið mættust í Pepsi deildinni var í lokaleik tímabilsins 2010 í grenjandi rigningu á Selfossi. Selfoss sem var fallið sigraði Grindavík örugglega 5-2 í þeim leik að viðstöddum heilum 217 áhorfendum. Við vonumst nú til að sjá fleiri hér í kvöld þó veðrið sé ekki mjög mikið skárra núna.

Það er slúðrað um það á Selfossi að Pape Mamadou Faye sé ekki í hóp í dag þar sem hann hafi mætt of sent. Seljum það þó ekki dýrar en við keyptum það.

Ágætis mæting á Selfossi í dag og mér heyrist Grindvíkingar vera mættir syngjandi í stúkuna og sama má segja um Skjálfta sem er að þramma syngjandi í stúkuna.

Leikur hafinn á Selfossi örlítið á eftir áætluðum kick off tíma. Heimamenn sækja í átt að Tíbrá og verða undan vindi í fyrri hálfleik.

Þetta fer frekar rólega af stað og mikið miðjumoð. Vörn Grindvíkinga er mjög þétt og það er ljóst að þá að skrúfa fyrir í dag.

Fyrsta alvöru færi leiksins og það fékk Viðar Örn sem komst einn í gegn en var allt of lengi að athafna sig og þetta rann út í sandinn. Selfyssingar virðast vera að taka leikinn aðeins yfir.

Leikurinn stopp í smá stund meðan Magnús dómari ræðir við Guðjón Þórðarson

Grindvíkingar hafa verið sterkir eftir að Selfoss skoraði og eru hættulegir í föstum leikatriðum og senda boltann mikið langt fram á Ameobi sem er nautsterkur einn uppi á toppi í liði Grindavíkur.

Alexander Magnússon í hörkufæri inni á vítateig en skaut boltanum yfir.

Viðar Örn í hörkufæri eftir aukaspyrni Stefáns Ragnars en hitti boltann illa.

Hálfleikur á Selfossi, hörkuleikur í gangi. Jafnræði með liðunum heilt yfir. Selfoss byrjaði betur og skoraði gott mark en hleypti Grindavík inn í leikinn og þeir jöfnuðu leikinn og enduðu hálfleikinn betur. Allt opið í þessu fyrir seinni hálfleik.

Það er farið að rigna hérna á Selfossi og því má búast við nokkrum hressilegum rennitæklingum í seinni hálfleik og ennþá meira fjöri.

Seinni hálfleikur hafinn

Dauðafæri hjá heimamönnum eftir gott upphlaup, Jón Daði virtist skjóta að marki en skotið misheppnað og fann Viðar á auðum sjó inn í teig en hann potaði boltanum rétt framhjá.

Ólafur Örn fyrirliði Grindvíkinga með hörkuskot sem silgdi yfir markið. Það eru 534 áhorfendur á leiknum í kvöld.

Ivar Skjerve virðist hafa verið sólaður upp úr skónum, a.m.k. datt hann af honum.

Leik lokið. Jón Daði var mjög nálægt því að skora í restina en skot hans hafnaði í stöng. Viðtöl og umfjöllun koma inn seinna í kvöld.