Dómarinn eyðilagði þennan leik. Leikurinn var að spilast að flestu leyti eftir uppskrift Vals. Menn voru að verjast vel og fengu lofandi skyndisóknir, sem hefði reyndar mátt nýta betur. Þrír rangir vítadómar réðu úrslitum í leiknum, sá fyrsti breytti honum algjörlega. Ef við reynum að horfa í eitthvað annað en ömurlega dómgæslu voru þó eðlilega þreytumerki á Valsmönnum í seinni hálfleik og sóknarleikurinn á löngum köflum ekki nægilega góður.

Það vantaði ekki senurnar í þennan leik. Stórfurðulegur fótboltaleikur. En vítaspyrnudómurinn í uppbótartíma, gjöfin sem heimamenn fengu, og svo hversu nálægt Anton var að verja vítið frá Bendtner... ég auglýsi eftir einhverjum lýsingarorðum yfir þetta!

Rosenborg slefar í næstu umferð forkeppni Meistaradeildarinnar og mætir þar Celtic. Valur heldur áfram í Evrópu en fer í forkeppni Evrópudeildarinnar þar sem framundan er Santa Coloma frá Andorra.

Valsmenn munu þurfa svefntöflur til að sofna í nótt. eftir að hafa verið rændir á þennan hátt. Þeir voru svo ótrúlega nálægt því að landa sögulegum úrslitum. Hrikalega svekkjandi að falla úr leik í svona rugli. Stefan Apostolov dómari leiksins átti það vondan dag að hann hlýtur að vera sviptur FIFA réttindum sínum. Það þurfa kannski fleiri svefntöflur í nótt.

Það hefur ekki farið framhjá neinum sem skoðar þessa skýrslu að dómgæslan var skandall. Allir þrír vítaspyrnudómarnir rangir. Enginn á vellinum skildi upp né niður í manninum. Að þessi gaur sé að fá Evrópuverkefni er rannsóknarefni.