SKÝRSLAN: ÍBV fallið (Staðfest)
Hvað réði úrslitum?
ÍA tók yfir leikinn eftir flottar 30 mínútur hjá ÍBV og kláraði tvö af nokkrum færum sínum, Eyjamenn geta nagað sig í handabakið að hafa ekki komist yfir í leiknum á fyrsta hálftímanum.
Bestu leikmenn
1. Viktor Jónsson (ÍA)
Viktor var öflugur í framlínu Skagamanna, lagði upp markið á Einar Loga en var samt í rauninni klaufi að skora ekki þá, svo átti hann stórkostlega sendingu á Gonzi sem sótti vítaspyrnuna. Hélt varnarmönnum Eyjamanna við efnið og lét þá hafa fyrir sér. Öflugur leikmaður þegar hann spilar vel.
2. Einar Logi Einarsson (ÍA)
Var eins og klettur í vörn Skagamanna og skoraði fyrsta mark leiksins af mikilli eftirfylgni.
Atvikið
Mark Gary Martin var heldur betur skrautlegt, skoraði gullfallegt mark en það fagnaði ekki nokkur maður á Akranesi eða í Borgarnesi, það hljóp enginn til Gary að fagna eða neitt.
Hvað þýða úrslitin?
ÍA skýtur sér upp í 25 stig og frá fallpakkanum, ÍBV er hinsvegar tölfræðilega fallið og munu enda í neðsta sæti deildarinnar.
Vondur dagur
Eyjamenn eru staðfest fallnir, myndi segja að þetta sé vondur dagur fyrir alla Eyjamenn.
Dómarinn - 9
Þorri og félagar alveg drullu flottir í dag, vítið hárrétt og ekkert vesen!