SKÝRSLAN: Langþráður sigur hjá Njarðvík staðreynd
Hvað réði úrslitum?
Tvö mörk frá Njarðvík gegn einu frá Magna réðu úrslitum.
Sanngjarnt segja sumir en "ef og hefði" svertir þetta eins. Leikurinn hefði þróast öðruvísi ef Magnamenn hefðu ekki misst fyrirliðann sinn af velli en að því sögðu er þetta gríðarlega mikilvægur sigur fyrir heimamenn og hleypur blússandi lífi í þessa baráttu undir rauða strikinu.
Bestu leikmenn
1. Atli Geir Gunnarsson
Var frábær í miðverði hjá Njarðvíkingum í dag og skilaði að auki marki.
2. Aliu Djalo/Stefán Birgir Jóhannesson
Þeir fá þetta saman félagarnir en Aliu Djalo var virkilega öflugur á miðjunni hjá Njarðvík og gaf þeim frábæran skjöld fyrir framan vörnina.
Stefán Birgir Jóhannesson dúkkaði upp þegar sem mest þurfti en hann var arkitektinn á bakvið bæði mörk Njarðvíkur í dag.
Atvikið
Rauða spjaldið.
Sá ekki hvað gerðist þarna en allt í einu ærist Njarðvíkurstúkan og Ivan Prskalo liggur eftir með Svein Óla yfir sér, aðstoðardómarinn gefur einhver merki og rautt spjald fer á loft. Margar sögur um hvað hafi átt sér stað en erfitt að fullyrða hvað gerðist nákvæmlega.
Hvað þýða úrslitin?
Njarðvíkingar fá RISA! þrjú stig en oft er þörf en í þeirra tilfelli var nauðsyn að fá öll stigin hér í dag.
Vondur dagur
Ætla gefa Gunnari Örvari þennan vafasama heiður en hann fékk fullkomið tækifæri til að bjarga allavega stigi fyrir gestina í lokin en krafturinn sveik hann í vippunni og boltinn fór yfir markið.
Gríðarlega svekkjandi en Gunnar Örvar hefði líklega klárað þetta í 9 af hverjum 10 skiptum en því miður fyrir hann og Magna var þetta ekki eitt af þessum níu skiptum.
Dómarinn - 4
Skiptar skoðanir um dómana hjá þeim í dag en þeir voru margir hverjir ansi skrautlegir og tilviljunarkenndir. Ætla sleppa þeim með 4 þar sem ég ætla að leyfa þeim að njóta vafans á þessu rauða spjaldi en ef Magnamenn fengu einhverju um það ráðið væri líklega mínus fyrir framan einkunina.