Leiknum er lokið. Liðin þurfa að sætta sig við jafntefli. Ég ætla út að gera nokkrar öndunaræfingar en lofa viðtölum og skýrslu hér síðar í kvöld.

Nú vilja Þróttarar víti! Boltinn fer í höndina á Ernu Guðrúnu í vítateig FH en ekkert er dæmt!

Ég er alltof stressuð til að skrifa nokkuð. Leikmenn liðanna eru einnig stressaðir og gengur illa að halda í boltann hér í uppbótartíma.

Ólöf sækir horn fyrir Þrótt. Andrea Rut setur boltann fyrir. Mary Alice er í baráttunni en Telma ver máttlausan skallann.

Ha? Stephanie flögguð rangstæð. Virtist alls ekki réttur dómur. Þetta er ekkert smá spennandi.

Þróttara setja háan bolta inná teig úr aukaspyrnunni. Enn og aftur er Telma hugrökk og fer út í teiginn að sækja boltann. Í þetta skiptið fær hún Stephanie í sig og liggur eftir. Spurning hvort Stephanie hefði ekki átt að fá spjald þarna.. En vonandi er í lagi með Telmu. Hún er búin að vera langbest í liði FH í kvöld.

Þetta er þvílíkt spennandi. Frábær fótboltaleikur í gangi í Laugardalnum! Mary Alice var að hamra boltann utan af velli en Telma gerði vel í að verja!

FH vinnur horn og það fer um Þróttara í stúkunni. Andrea Mist setur boltann fyrir og það skapast mikil hætta. Mér sýnist það vera Morgan Goff sem nær að henda sér fyrir skot FH. Stuttu síðar fær FH aðra hornspyrnu og þá er það framherjinn Stephanie sem á geggjaða tæklingu og nær að henda sér fyrir skot Ernu Guðrúnar!

ÓLÖF SIGRÍÐUR! Þvílík sókn og þarna átti Ólöf Sigríður að skora! Stephanie sendir hana eina í gegn. Telma kemur út á móti en Ólöf fer framhjá henni. Það er ennþá langt í markið og sóknarmaðurinn ungi nær ekki að stýra skoti sínu á markið!

Madison með fína takta og vinnur hornspyrnu fyrir FH. Hornspyrnurnar hafa verið eins og dauðafæri fyrir FH í leiknum og þessi er hættuleg! Andrea Mist setur boltann fyrir og Sigríður Lára á skalla framhjá! Það virðist hafa kviknað á FH-ingum eftir jöfnunarmarkið.

Þarna er Álfhildur heppin. Er alltof sein aftan í Phoenetiu sem var á leið inná Þróttarateiginn. Ekkert dæmt. Fyrsta sókn FH í seinni hálfleik.

Kjánalegt hjá Friðriku. Hleypur langt út úr markinu sínu til að reyna að halda boltanum inná. Rennir sér hinsvegar í boltann sem endar í innkasti. Alveg galið þar sem Þróttur hefði átt innkastið.

Nú lætur Andrea Rut vaða rétt utan teigs en Telma ver skotið og er svo fljót að hirða upp frákastið.

Heimakonur hafa verið með mikla yfirburði hér í byrjun seinni hálfleiks. Stephanie var að snúa Ernu Guðrúnu af sér og reyndi svo skot af vítateigslínunni. Setur boltann beint á Telmu en hefði sjálfsagt mátt fara aðeins nær þarna.

Þróttarar koma boltanum í netið en markið dæmt af. Stephanie braut af sér áður en hún kláraði færið.

Enn og aftur er Telma að koma vel út í teiginn inn og stoppa hættulega sénsa Þróttar. Er á undan Stephanie í sendingu frá Mary Alice.

Þróttarar geysast í sókn og komast 3v3. Laura stingur á Ólöfu til hægri og Ólöf setur svo hættulegan bolta fyrir þar sem Stephanie mætir á harðaspretti. Nær skallanum en stýrir honum ekki á rammann!

Þarna er Eva Núra mjög heppin að sleppa við spjald. Brýtur á Stephanie og krækir svo fótunum utan um lappirnar á henni og heldur henni þannig fastri. Eva var nefnilega líka stálheppin að fá ekki spjald í fyrri hálfleik þegar hún togaði í Þróttara sem ætlaði að bruna upp kantinn.

Síðari hálfleikur er hafinn. Hvorugur þjálfaranna gerir breytingu á sínu liði.

Ásmundur flautar til hálfleiks. Gestirnir leiða 2-0 en bæði mörkin komu eftir hornspyrnur á 5 mínútna kafla snemma leiks. Þróttarar hafa aðeins rankað við sér eftir að hafa lent undir en hafa þó ekki náð að bíta nægilega fast frá sér til að gera leikinn spennandi. Heilar 45 mínútur eftir og það er að duga eða drepast fyrir bæði lið. 3 RISA stig í boði.

TELMA! Geggjuð varsla hjá Telmu! Ólöf komst upp hægra megin og kom boltanum inn á teig á Stehanie. Hún náði að snúa af sér varnarmann og negldi svo á markið en Telma varði virkilega vel! Þróttarar fengu svo horn í kjölfarið en náðu ekki að gera sér mat úr því.

Þróttarar fá líflínu þegar brotið er á Stephanie innan teigs og vítaspyrna dæmd. Mary Alice fer á punktinn en setur boltann vel framhjá!

Þróttur fær aukaspyrnu úti á miðjum velli. Spila stutt og sóknin endar svo á því að Morgan á stórhættulega sendingu þvert fyrir FH-markið en þar er enginn Þróttari mættur!

Telma Ívarsdóttir er búin að vera hrikalega flott í leiknum. Er búin að stoppa nokkra hættulega sénsa Þróttara með því að vera eldsnögg út í teiginn sinn. Nú var hún að komast á undan Ólöfu Sigríði í boltann eftir frábæran undirbúning Stephanie.

Nik og Edda eru búin að breyta skipulaginu aðeins hjá sér. Morgan er farin upp á miðjuna, Sóley í miðvörð og Mary Alice í vinstri bakvörð.

Stórhættuleg sókn hjá FH. Phoenetia brýst upp vinstra megin og setur boltann svo fyrir markið og í áttina að Helenu sem var mætt á fjærstöngina. Friðrika gerir hinsvegar vel og nær að blaka boltann af hættusvæðinu.

Þróttarar eru í tómu tjóni við að verjast föstu leikatriðum FH. Nú fengu FH-ingar aukaspyrnu úti á vinstri vængnum. Andrea Mist setti boltann inn á teig og þar varð misskilningur á milli markmanns og varnarmanna. Þetta endar á því að Friðrika kýlir boltann klaufalega upp í loft og hann fer svo af varnarmanni og aftur fyrir. FH fær horn en í þetta skiptið gengur öllu skárr hjá heimakonum að koma boltanum af hættusvæðinu.

Vá Taylor! Á algjöra lykiltæklingu þegar hún nær að henda sér fyrir skot Stephanie af markteig. Kom þarna í veg fyrir að Þróttarar minnkuðu muninn.

Flott sókn hjá Þrótti. Andrea spilar Ólöfu Sigríði í fína stöðu hægra megin í teignum. Hún setur boltann svo fastan fyrir með jörðinni en bæði Morgan og Stephanie rétt missa af boltanum!

Fyrsta alvöru tilraun Þróttar frá dauðafærinu strax í upphafi leiks. Stephanie Mariana skoraði með draumaskoti í síðasta leik og reynir slíkt hið sama núna. Telma gerir vel í að verja!

FH liðið er að ógna. Phoenetia var að detta í teignum og vill víti. Ásmundur dómari alveg ofan í þessu og dæmir ekkert. FH fær hinsvegar horn í kjölfarið og þar skapast hætta áður en Laura nær að hreinsa!

Fínn séns hjá Rannveigu! Skot hennar úr teignum sleikir stöngina!

FH fær aukaspyrnu á fínum stað úti vinstra megin. Andrea Mist setur frábæran bolta á fjærstöngina þar sem Sigríður Lára setur hausinn í hann en nær ekki að stýra honum og missir hann aftur fyrir.

Það er áhugavert að sjá að "vinstri bakvörðurinn" Mary Alice byrjar á hægri kantinum hjá Þrótti í kvöld. Annars er flest eftir bókinni hjá báðum liðum.

Lið FH: Telma Eva Núra - Taylor - Ingibjörg - Valgerður Andrea Mist - Sigríður Lára Helena - Rannveig - Madison Phoenetia

Lið Þróttar: Friðrika Elísabet - Jelena - Morgan - Sóley Álfhildur Laura - Andrea Mary Alice - Stephanie - Ólöf

VÁÁÁ! Hérna munar ENGU! Mary Alice laumar boltanum frábærlega inná teig á Ólöfu Sigríði sem er að komast í DAUÐAFÆRI. Fyrsta snertingin svíkur hana hinsvegar og Telma nær að henda sér á boltann!

FH-ingar hefja leik og leika í átt að miðbænum.

Liðin eru komin út á völl. Ganga inn undir dramatísku inngöngulagi. Framundan er stríð!

Það er fallegt haustkvöld í Laugardalnum. Aðeins skýjað og örlétt gola. Verð að viðurkenna að ég er svolítið hissa á mætingunni. Örfáir stuðningsmenn mættir þegar 5 mínútur eru í einn af mikilvægustu leikjum tímabilsins fyrir bæði lið. Íslenska stundvísin...

Byrjunarliðin eru klár eins og sjá má hér til hliðar. Álfhildur Rósa snýr aftur í lið Þróttar og við það fer Ísabella Anna á bekkinn. Hjá FH kemur Eva Núra inn í liðið á kostnað Ernu Guðrúnar sem fer á bekkinn.

Liðin hafa mæst tvisvar í sumar. Þróttarar höfðu betur í fyrri viðureign liðanna í deildinni. Unnu þá 2-1 útisigur í dramatískum leik. Nokkrum dögum síðar hefndu FH-ingar fyrir tapið með því að slá Þrótt úr leik í bikarnum. Unnu þá 1-0 með fallegu marki Andreu Mistar Pálsdóttur.

Deildin hefur líklega aldrei verið eins spennandi og framundan er sturluð barátta bæði á toppi og botni deildarinnar. Það eru aðeins 4 stig sem skilja að liðin í 6.-10. sæti og þónokkrir fallkandidatar í deildinni. Þróttur er í 9. sæti með 11 stig en FH er í 8. sæti með 12 stig.

Heil og sæl! Verið velkomin í beina textalýsingu frá viðureign Þróttar og FH í lokaleik 14. umferðar efstu deildar. Framundan er ROSALEGUR leikur. Nýliða- og fallslagur þar sem allt verður skilið eftir á vellinum.