SKÝRSLAN: Valur fann vængina eftir hlé
Hvað réði úrslitum?
Skagamenn mættu baráttuglaðir inn í leikinn og í miklum varnargír. Á endanum reyndust Valsmenn þó sterkari. Meistararnir stilltu saman strengi í hálfleik, fundu miklu betri takt í sóknarleiknum og unnu verðskuldað.
Bestu leikmenn
1. Patrick Pedersen - Valur
Heimamenn fundu Patrick ekkert í fyrri hálfleik en í seinni sýndi hann gæði sín með marki og stoðsendingu.
2. Kristinn Freyr Sigurðsson - Valur
Flott byrjun á tímabilinu. Skoraði seinna mark Vals.
Atvikið
Þegar Valur braut ísinn. ÍA hafði lokað vel á meistarana og gefið sárafá færi á sér. En stungusending Kaj Leo splundraði vörninni, Patrick slapp í gegn og þá er ekki að spyrja að leikslokum.
Hvað þýða úrslitin?
Valsmenn byrja sumarið á sigri en það er þétt leikjaprógramm framundan í maí. Næst er komið að stórleik gegn FH. Skagamenn eiga Víking næst.
Vondur dagur
Margir Skagamenn sem áttu flottan fyrri hálfleik urðu skugginn af sjálfum sér í þeim síðari. Ísak Snær sem átti flottan fyrri hálfleik nældi sér í rautt spjald í seinni hálfleiknum og eftir það áttu þeir gulu ekki möguleika.
Dómarinn - 8,5
Ekki auðveldur leikur að dæma. Það var hart barist en þriðja liðið stóð sig vel.