KR var eftir fyrsta markið með svo gott sem fullkomna stjórn á leiknum fyrir utan stuttan kafla eftir hálftíma leik. Eina sem vantaði í leik gestanna voru fleiri mörk. Leiknisliðinu gekk illa að tengja og réði illa við massífa Vesturbæinga.

Annað markið. Frábær sókn sem endar á því að Ægir þræðir boltann inn á Flóka sem vippar framhjá Guy í úthlaupi. Boltinn er á leiðinni í netið og Kjartan Henry rændi markinu á línunni með því að þruma boltanum í netið. Mér fannst rangstöðulykt af þessu á vellinum.
Seinkunin í upphafi leiks fær einnig tilnefningu, bæði lið voru í dökkum sokkum og var ekki hægt að hefja leik á réttum tíma vegna þess. Hvítir sokkar voru græjaðir á gestina og hófst leikurinn um þremur mínútum of seint.

Annað tap Leiknis í röð og fyrsta tapið á heimavelli. Á sama tíma annar sigur KR í röð og virkuðu KR-ingar ansi sannfærandi.

Það voru eiginlega margir í Leiknisliðinu sem voru daprir í kvöld. Ég ætla að vera leiðinlegur og segja að Daníel Finns hafi átt off dag og Sævar Atli komst í lítinn sem engan takt við leikinn.
Þetta var einnig vondur dagur fyrir þá sem vildu sjá síða hárið hans Óskars Arnar í Breiðholtinu, hann mætti með talsvert minna hár eftir landsleikjahléið.

Heilt yfir bara vel dæmdur leikur og ég tók ekki mikið eftir Sigga í leiknum. Fannst framkvæmdin á gula spjaldinu á Gyrði skrítin og ansi hart að spjalda Kjartan Henry fyrir pressuna á Guy í seinni hálfleik.