SKÝRSLAN: Rosenborg sýndi gæði sín en fínasta frammistaða hjá FH
Hvað réði úrslitum?
Það sást smá gæðamunur á liðunum í kvöld þó hann hafi verið minni en ég bjóst við fyrir leik. Það komu þessi tvö augnablik þegar gestirnir skoruðu, þau komu ekkert eftir einhverja frábæra leikkafla heldur nýttu gestirnir opnanir vegna einbeitingarleysis, góð lið refsa fyrir slíkt. FH-ingarnir mega vera stoltir því spilamennskan úti á velli var alls ekki léleg og sköpuðu heimamenn sér fínustu færi til að skora mark og jafnvel mörk.
Bestu leikmenn
1. Carlo Holse
Fannst vera mestu gæðin í Holse af þeim sem spiluðu þennan leik. Sýndi að hann er með góðan fót og hann sá opnunina í fyrra markinu, fann opna svæðið á nærstönginni og kom gestunum yfir.
2. Matthías Vilhjálmsson
Fyrirliði FH var virkilega góður, var til fyrirmyndar þegar kom til baráttu og vinnusemi. Hefði verið maður leiksins hefði hann skorað úr dauðafærinu sínu.
Atvikið
Fyrra markið, kom eins og þruma úr heiðskíru lofti eiginlega. Fyrirgjöf frá vinstri, Holse var einn og óvaldaður inn á teignum og skallaði í netið.
Hvað þýða úrslitin?
Rosenborg er í frábærri stöðu til að fara áfram, leiða með tveimur mörkum. Það eru batamerki á leik FH frá því fyrr í sumar, þeir geta lært af þessum leik og seinni leiknum líka. Miði er alltaf möguleiki.
Vondur dagur
Færanýting FH-inga var svekkjandi.