Góða kvöldið kæru lesendur og verið velkomin í beina textalýsingu frá leik Stjörnunnar og FH í Pepsi deild karla. Leikurinn hefst klukkan 19:15. Alen Sutej er í fyrsta skiptið í leikmannahópi FH frá því að hann kom til liðsins frá Keflavík í vetur, en hann hefur verið að glíma við erfið meiðsli. Hjá FH eru Björn Daníel Sverrisson, Pétur Viðarsson og Freyr Bjarnason í banni. Hjá Stjörnunni er Halldór Orri Björnsson í leikbanni.

FH er í 3. sæti deildarinnar með 31 stig eftir frábært gengi að undanförnu. Stjarnan er í 5. sætinu með 24 stig og þurfa Garðbæingarnir nauðsynlega á sigri að halda ef þeir ætla sér að ná í Evrópusæti. FH getur hins vegar haldið áfram að pressa á topplið KR og ÍBV með sigri.

Við minnum lesendur sem vilja tjá sig um leikinn á Twitter að nota hashtaggið #fotbolti - vel valdar Twitter færslur birtast hér í textalýsingunni.

Vallarþulurinn Maggi Diskó fer á kostum líkt og vanalega og reitir af sér brandarana. Það er þess virði að koma á Stjörnuvöllinn þó ekki væri nema til að hlusta á hann í mæknum. Þessi maður er snillingur.

Fyrirmyndarleikmaðurinn, átak á vegum Landæknis, KSÍ, ÍSÍ, UMFÍ og ÁTVR, er kynnt og er Halldór Orri Björnsson, fyrirmyndarleikmaður Stjörnunnar, látinn fá veggspjald átaksins sem verður staðsett í félagsaðstöðu Stjörnunnar. Fyrirmyndaleikmaðurinn er átak gegn munntóbaksnotkun, en einn leikmaður frá hverju liði í efstu deild gegnir þessu hlutverki.

Leikurinn er hafinn og það eru FH-ingar sem byrja með knöttinn.

Bjarki Páll Eysteinsson keyrir á Tommy Nielsen og nær knettinum og kemst í fínt skotfæri, en skot hans er ekki nógu gott og fer framhjá markinu.

Það er ljóst að hvorugt liðanna getur stillt upp sínu sterkasta byrjunarliði. Jesper Jensen er frá út tímabilið hjá Stjörnunni og auk þess er Halldór Orri í banni, þannig að Garðbæingana vantar sína tvo bestu menn. FH-ingar eru í vandræðum með vörnina, þeir Tommy Nielsen og Ásgeir Gunnar Ásgeirsson eru í miðverðinum vegna forfalla og þá er Ólafur Páll Snorrason enn tæpur og byrjar á bekknum.

Bæði lið hafa átt skot á markið með skömmu millibili en hvorugt þeirra hitti á rammann. Emil Pálsson skaut framhjá úr ágætu skoti utan teigs og í næstu sókn fór skot Stjörnumanns framhjá.

Áfram heldur Stjarnan að pressa. Atli Jóhannsson á skot úr þröngu færi sem Gunnleifur ver, en FH-ingar tapa boltanum strax aftur, hár bolti berst inn í teiginn og Ellert Hreinsson skallar boltann rétt framhjá.

FH-ingar aðeins að lifna við eftir dapra byrjun. Matthías Guðmundsson á skalla rétt framhjá úr fínu færi eftir góða fyrirgjöf.

HVÍLÍK TÆKLING hjá Daníel Laxdal!! Vörn Stjörnunnar galopnaðist og Hólmar Örn var kominn í dauðafæri einn gegn Ingvari í markinu. Daníel mætti hins vegar á svæðið og bjargaði málunum fyrir Stjörnuna með heimsklassa tæklingu.

Ekki mikið í gangi þessa stundina. FH-ingar eru meira með boltann en Stjörnumenn berjast eins og ljón og gefa ekkert eftir.

Frábær markvarsla! Atli Viðar Björnsson fékk boltann og hélt honum vel, renndi svo út á Hólmar Örn sem kom á skriði og þrumaði boltanum að markinu, en Ingvar varði frábærlega!

Aftur ver Ingvar frábærlega! Í þetta skiptið varði hann gott skot frá Atla Guðnasyni í hornspyrnu, sem ekkert varð síðan úr. FH-ingar eru farnir að pressa ansi stíft!

Hvílík meistaramarkvarsla enn og aftur hjá Ingvari! Emil Pálsson fór hrikalega illa með Hörð Árnason og gaf síðan fyrir á Guðmund Sævarsson sem náði góðu skoti! En Ingvar varði frábærlega!

Ellert Hreinsson skorar mark en það er dæmt af! Jóhann Laxdal kom með frábæra fyrirgjöf á Ellert en Gunnlefiur varði skot hans meistaralega. Ellert náði boltanum hins vegar aftur og skoraði en dómarinn vildi meina að hann hefði tekið á móti boltanum með höndinni og því stóð markið ekki.

Ellert Hreinsson með tvö skot framhjá með skömmu millibili úr góðum færum! Mörkin í þessum leik hefðu hæglega getað orðið fleiri fram að þessu.

Flautað hefur verið til leikhlés í stórskemmtilegum leik hérna í Garðabænum! Staðan er 1-0 fyrir Stjörnunni en þessi viðureign hefur næstum því verið jafn fjörug og leikur Man Utd og Arsenal í gær.

Leikurinn er hafinn á ný og Stjarnan leiðir 1-0 þegar seinni hálfleikur hefst.

Aðsóknarmet hefur verið slegið í sumar í Garðabænum. 1283 manns eru mættir á svæðið, sem verður að teljast býsna gott.

FH-ingar mæta grimmir í seinni hálfleikinn og eiga hér flotta sókn sem endar hjá Atla Viðari. Skot Atla er fínt en enn og aftur er Ingvar að bjarga Stjörnunni!

Daníel Laxdal keyrir upp kantinn hjá Stjörnunni og reynir svo fyrirgjöfina á Bjarka Pál en Hákon Hallfreðsson bjargar í horn. Úr hornspyrnunni verður síðan önnur hornspyrna.

Daníel Laxdal fær dauðafrían skalla en hann fer framhjá markinu! Skallinn var fastur en ekki nægilega góður, þarna hefði hann átt að hitta á markið. Gunnleifur markvörður er eitthvað aumur og virðist þurfa að fara af velli.

FH-ingar fá aukaspyrnu á hættulegum stað. Viktor Örn tók spyrnuna og Hákon Atli náði skallanum en hann endaði beint í hrömmum Ingvars.

Hver hefði trúað þessu? Þrjú mörk á átta mínútum frá Stjörnunni. FH vörnin er alveg að drulla upp á bak og augljóst að það munar mikið um þá Frey Bjarnason og Pétur Viðarsson. Þeir eiga engin svör við snöggum og góðum sóknarleik Stjörnunnar sem er að spjara sig virkilega vel án tveggja lykilmanna.

Þarna hefði Þorvaldur Árnason getað komið Stjörnunni í 5-0 en skalli hans fór rétt framhjá markinu. Flott innkoma hjá Þorvaldi.

Ingvar Jónsson ver enn og aftur glæsilega! FH-ingar fá aukaspyrnu á hættulegum stað og spyrna Matta Vill er hnitmiðuð í vinstra hornið, en Ingvar ver vel!

Leikurinn er aðeins að fjara út, bæði lið vita að úrslitin eru löngu ráðin og allt bendir til þess að 4-0 verði lokatölur.

Leiknum er lokið með ótrúlegum 4-0 sigri Stjörnunnar! Þeir binda enda á fimm leikja sigurhrinu FH-inganna og blanda sér í baráttuna um Evrópusæti! Hreint út sagt ótrúlegur sigur! FH-ingar voru ekki nema skugginn af sjálfum sér og Garðbæingar gengu á lagið!